سیف آپ اپنی آرزو سے بیگانے ہو گئے ہیں-سیف الدین سیف

[Saraah]

آپ اپنی آرزو سے بیگانے ہو گئے ہیں
ہم شوق ِ جستجو میں دیوانے ہو گئے ہیں

فرقت میں جن کو اپنا کہہ کہہ کر دن گزارے
وہ جب سے مل گئے ہیں بیگانے ہو گئے ہیں

کہتے ہیں قصہ غم ہر انجمن میں جا کر
ہم اہل دل بھی کیسے دیوانے ہو گئے ہیں

آنکھوں سے جو نہاں تھے ار دل میں کارفرما
وہ راز ہوتے ہوتے افسانے ہو گئے ہیں

یا اب تری جفا میں وہ لذتیں نہیں ہیں
یا ہم تری نظر میں بیگانے ہو گئے ہیں

گو بے تعلقی ہے اُس انجمن میں پھر بھی
جب مل گئی ہیں نظریں افسانے ہو گئے ہیں

ہر منزل ِ طلب میں رفتار ِ پا سے اپنی
جو نقش بن گئے ہیں بت خانے ہو گئے ہیں

تعمیر کی ہوس نے سو بار دل اجاڑا
پہلو میں سیف کتنے ویرانے ہوگئے ہیں

 

[حسن جاوید]

زبردست کیا بات ہے اس بندے کو یہ غزل پسند آی...

 

[حسن جاوید]

آنکھوں سے جو نہاں تھے ار دل میں کارفرما

اس فکرے میں تھوڑی گڑبڑ ہے

 

[دوست]

پاء جی قینچی والا قاف کیو پر ہے۔ فقرہ ہوتا ہے لفظ ویسے۔

 

[فرخ منظور]

بہت عمدہ غزل ہے۔ شکریہ سارہ۔ ایک جگہ اور کی بجائے ار لکھا گیا ہے اسے درست کر دیں۔

 

[محمد وارث]

بہت شکریہ آپ کا سیف کی خوبصورت غزل شیئر کرنے کیلیے۔