آ فر چھوٹی عمر دی اج ایہہ گل دہرائیے

[عبدالقیوم چوہدری]

چل سکولے چلیے دوویں
کچی دا چل قاعدہ پڑھیے
کسے دے کولوں گاچی لے کے
تختی دھو کے دھپے دھر کے
ماسٹر کولوں قلم گھرائیے
آ فر چھوٹی عمر دی اج ایہہ گل دہرائیے

جدوں سکولوں چھٹی ہووے
پنڈوں باہر ----- مکئی دی بنی
اتے چادر سٹ کے بہیے
اک دوجے نال گلاں کریے
اک دوجے دے درد ونڈائیے
آ فر چھوٹی عمر دی اج ایہہ گل دہرائیے

کچا ویہڑا لبھیے کدھروں
جس دی چپہ چپہ بھبھل
ہتھاں دے نال دور ہٹا کے
شاہ شٹاپو کھیڈن دے لئی
گاٹی دے نال خانے واہییے
آ فر چھوٹی عمر دی اج ایہہ گل دہرائیے

اج دے دن نوں عید سمجھ کے
سوہنے دھوتے کپڑے پا کے
بوہڑ دے ودھے ڈاہن دے اتے
سن دا موٹا رسا پا کے
واری واری پینگھ چڑائیے
آ فر چھوٹی عمر دی اج ایہہ گل دہرائیے

ڈیڑے تے کھوہ وگدا ہووے
نسے بھجے جائے دوویں
گاہدی اتے جھوٹے لیئے
ٹنڈاں وچوں پانی پی کے
اولو دے وچ خوب نہائیے
آ فر چھوٹی عمر دی اج ایہہ گل دہرائیے

توں میں ہوئے کمرے اندر
باہروں چا کوئی کنڈی لاوے
اسی دوویں رل کے اندر
چیکاں ماریے شور مچائیے
آ فر چھوٹی عمر دی اج ایہہ گل دہرائیے

اک دوجے نال ملن گلن توں
بھاویں گھر دے روکن سانوں
فیر وی اسیں لک لکا کے
چن دی لو وچ ادھی راتیں
کوٹھے اتے چکر لائیے
آ فر چھوٹی عمر دی اج ایہہ گل دہرائیے
​

۔۔۔
از ڈاکٹر اعجاز احمد بھٹہ

​

 

[جاسمن]

سوہنڑی نظم۔

 

[ڈاکٹرعامر شہزاد]

بہت اعلیٰ جی ۔ لاجواب ۔ ساریاں یاداں اک اک کر کے اکھاں دے سامنے آ گئیاں نیں ۔

 

[عبدالقیوم چوہدری]

سوہنڑی نظم۔

مہربانی جی۔

بہت اعلیٰ جی ۔ لاجواب

شکریہ جی۔

ساریاں یاداں اک اک کر کے اکھاں دے سامنے آ گئیاں نیں ۔

جی آ۔ ایخو گل اے۔

 

[رومانہ چوہدری]

نسٹلجیہ لیکن نہایت خوبصورت۔ عمدہ شئیرنگ

 

[عبدالقیوم چوہدری]

نسٹلجیہ لیکن نہایت خوبصورت۔ عمدہ شئیرنگ

مہربانی جی۔

 

[یوسف سلطان]

بهت ودهيا

 

[عبدالقیوم چوہدری]

بهت ودهيا

مہربانی جناب۔