اب کوئی آئینہ دیکھا نہیں جاتا

[ظفری]

محسن حجازی بھائی کے نقشِ قدم پر چلتے ہوئے علم وعروض کو ایک طرف رکھ کر ایک بار پھر کچھ کہنے کی جسارت کی ہے ۔ اُمید ہے استادِ محترم سمیت دیگر احباب بھی میری رہنمائی فرمائیں گے ۔ شکریہ

​

اب کوئی آئینہ دیکھا نہیں جاتا​

روز اپنا تماشہ دیکھا نہیں جاتا​

​

اسکی وفاؤں کے تذکرے ہر جگہ​

اور ہمارا گلہ دیکھا نہیں جاتا​

​

تمام عمر اک سکوت میں گذری​

شور ہر جگہ دیکھا نہیں جاتا​

​

اندر قیامت کی گھٹن لیکن​

باہر وا دریچہ دیکھا نہیں جاتا​

​

سچ کتابوں میں پڑھا ظفر بہت​

اب کہیں بولتا دیکھا نہیں جاتا​

 

[شمشاد]

مجھے تو پسند آئی آپ کی شاعری، کیونکہ مجھے شاعری کی الف بے بھی نہیں معلوم۔

اساتذہ کرام کی تھپکی کا انتظار کریں۔

 

[زبیر مرزا]

وا ہ جناب کیا بات ہے - آپ کے مزید کلام کا شدت سے انتظار رہے گا

 

[مہ جبین]

اساتذہ کرام کی رائے سے پہلے اس پر کوئی تبصرہ نہیں ہونا چاہئے سو ظفری بھائی میری رائے محفوظ ہے

 

[ظفری]

تمام احباب کی پسندیدگی کا شکریہ ۔ مہ جبین سسٹر ! اساتذہ کی ڈانٹ کے بعد آپ کی بھی رائے کا انتظار رہے گا ۔

 

[محمد خلیل الرحمٰن]

ظفری بھائی بہت خوبصورت غزل ہے۔
ہماری صلاح ( اصلاح نہیں) بشرطِ اجازت مندرجہ ذیل ہے، گر قبول افتد زہے عزّ و شرف۔

​

اب کوئی آئینہ جیسا نہیں دیکھا جاتا​

روز اپنا ہی تماشا نہیں دیکھا جاتا​

​

ہر جگہ اس کی وفاؤں کے ہیں چرچے شاعر/ظفری​

اورگلہ اپنا ذرا سا نہیں دیکھا جاتا​

​

عمر ساری تو کٹی ایک سکوں کی صورت​

شور اب زیست میں برپا نہیں دیکھا جاتا​

​

اپنے اندر ہے قیامت کی گھٹن اک طاری​

پر دریچہ کوئی اب وا نہیں دیکھا جاتا​

​

سچ کتابوں میں کہیں ہم نے پڑھا تھا ظفری​

اب کہیں کوئی بھی کہتا نہیں دیکھا جاتا​

 

[الف عین]

ظفری کی تو اصلاح کر ہی دی ہے خلیل نے۔ اب مزید اصلاح کی ضرورت تو نہیں۔ بہر حال

اب کوئی آئینہ جیسا نہیں دیکھا جاتا​

میں ظفری کے مطیع والا مکمل مفہوم نہیں آتا۔​

ہم سے اب کوئی بھی شیشا نہیں دیکھا جاتا​

بہتر ہو گا۔​

عمر ساری تو کٹی ایک سکوں کی صورت​

شور اب زیست میں برپا نہیں دیکھا جاتا​

’ایک سکوں‘ چہ معنی؟اور’عمر ساری تو کٹی‘ سے عشقِ بتاں کا خیال آتا ہے​

عمر گزری ہے سدا چین سے، خاموشی سے​

اب ذرا شور شرابا نہیں دیکھا جاتا​

بہتر نہیں ہو گا؟​

اپنے اندر ہے قیامت کی گھٹن اک طاری
پر دریچہ کوئی اب وا نہیں دیکھا جاتا​

یہاں بھی ’اک‘ کھٹکتا ہے۔ اسے ’سی‘ سے بدلا جا سکتا ہے۔​

اور دوسرے مصرع کو​

اب دریچہ بھی کوئی وا نہیں دیکھا جاتا​

کیا جا سکتا ہے۔​

@ظفری، تم ایسا کرو کہ اپنا وہ مجموعہ کلام جو 2005 میں چھپنے والا تھا، اور میرے ’اعتراض‘ پر ٹھنڈے بستے میں دال دیا گیا، اسے خلیل کو بھیج دو۔ خلیل کو اصلاح کا مزید تجربہ ہو جائے گا، اور میرے لئے اصلاح کا کام آسان!!​

 

[مہ جبین]

تمام احباب کی پسندیدگی کا شکریہ ۔ مہ جبین سسٹر ! اساتذہ کی ڈانٹ کے بعد آپ کی بھی رائے کا انتظار رہے گا ۔

ظفری بھائی اب اساتذہ کی معتبر اور مستند اصلاح اور شفیق سی ڈانٹ کے بعد کسی کم عقل اور کم فہم کے بولنے کی کیا گنجائش رہ جاتی ہے
بس اسی لئے تو رائے کو محفوظ رکھا تھا کہ بڑوں کے آگے بولنا بد تہذیبی ہے

 

[ظفری]

خلیل الرحمن صاحب آپ کی محبت اور توجہ کے لیئے انتہائی ممنون ہوں ۔ اُمید ہے آپ یونہی پذیرائی اور حوصلہ افزائی سے نوازتے رہیں گے ۔ ایک بار پھر شکریہ

 

[ظفری]

استادِ محترم ۔۔۔ آپ کی عنایتوں اور خلوص کا شکریہ ادا کرنا محال ہے ۔ آئندہ بھی آپ کی توجہ کا طالب رہوں گا ۔

@ظفری، تم ایسا کرو کہ اپنا وہ مجموعہ کلام جو 2005 میں چھپنے والا تھا، اور میرے ’اعتراض‘ پر ٹھنڈے بستے میں دال دیا گیا، اسے خلیل کو بھیج دو۔ خلیل کو اصلاح کا مزید تجربہ ہو جائے گا، اور میرے لئے اصلاح کا کام آسان!!​

استادِ محترم ! گستاخی معاف ۔۔۔۔ آپ یہاں ایک تیر سے دو شکار کرگئے ہیں ۔

 

[محمد خلیل الرحمٰن]

خلیل الرحمن صاحب آپ کی محبت اور توجہ کے لیئے انتہائی ممنون ہوں ۔ اُمید ہے آپ یونہی پذیرائی اور حوصلہ افزائی سے نوازتے رہیں گے ۔ ایک بار پھر شکریہ

کمال کرتے ہیں ظفری بھائی آپ بھی۔ محبت اور توجہ تک تو ٹھیک تھا پر یہ موٹے موٹے الفاظ جن کے ہم لائق نہیں۔ وہ تو استادِ محترم کی نظرِ کرم اور آپ کی ذرہ نوازی ہے ورنہ من آنم کہ من دانم۔
شکریہ آپ کی حوصلہ افزائی کا۔ خوش رہئیے محترم