طارق شاہ
محفلین
اب کی چلی وطن میں ہَوا کِس طرف کی ہے
پھیلی نویدِ صُبحِ جزا کِس طرف کی ہے
ہو احتساب اگر تو بِلا امتیاز ہو!
مغرب کی گر نہیں تو وَبا کِس طرف کی ہے
محفِل عدُو کے گھر سی ہے غُربت کدہ پہ بھی !
نیّت ، اے جانِ بزم! بتا کِس طرف کی ہے
احساس و عقل سے جو تِری بالا تر ہے تو
"مٹّی اُڑا کے دیکھ ہَوا کِس طرف کی ہے"
ہے اِک طرف خُدا تو صنم دوسری طرف
کیسے کہوں کہ کھینچے صدا کِس طرف کی ہے
دشمن کہ دوست، چارہ گری میں سب ایک سے
زخموں کو کیا غرض کہ دَوا کِس طرف کی ہے
ہو کُچھ تو فاصلہ سا خلؔش زیست و مرگ میں
بُوجھیں تو، رہگُزر یہ فضا کِس طرف کی ہے
شفیق خلؔش