اذانِ حق برائے اصلاح

[ارشد چوہدری]

الف عین ،فلسفی،خلیل الرحمن،یاسر شاہ اور دیگر اساتذہ
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
افاعیل۔۔ مفاعلاتن مفاعلاتن مفاعلاتن مفاعلاتن
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
یہی ہے سب سے بڑی عبادت خدا کے رستے میں جان دینا
بہت ہی مشکل یہ زندگی ہے خدا کو اپنی کمان دینا
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
کرو جو وعدہ کرو وہ پورا یہی تو فرمان ہے خدا کا
اگر ہو مشکل کرو نہ وعدہ سمجھ کے اپنی زبان دینا
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
میں جان دے کر بچا لوں ایماں بُرا یہ میرا نہیں ہے سودا
مجھے بچانا خطا سے یا رب مجھے تُو اپنی امان دینا
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
یہاں پہ رہ کر کریں گے جو بھی حساب دینا پڑے گا اُس کا
تمہیں بنانا پڑے گی عادت خطا پہ اپنی دھیان دینا
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
اگر کسی کو امان دو گےخدا سے اُس کا اجر ملے گا
کسی کو کھانا کسی کو پانی کسی کو اپنا مِلان دینا
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
نہ ظلم ارشد کرے کسی پر نہ ظلم ہوتا وہ دیکھ پائے
نہ ظلم سہنا کبھی کسی کا سدا ہی حق کی اذان دینا
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

 

[الف عین]

یہی ہے سب سے بڑی عبادت خدا کے رستے میں جان دینا
بہت ہی مشکل یہ زندگی ہے خدا کو اپنی کمان دینا
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ دونوں مصرعے بلکہ ثانی مصرع کے دونوں ٹکڑے ربط سے عاری ہیں
خدا کو کمان دو یا نہ دو، کمان تو اسی کے ہاتھ میں ہے!!

کرو جو وعدہ کرو وہ پورا یہی تو فرمان ہے خدا کا
اگر ہو مشکل کرو نہ وعدہ سمجھ کے اپنی زبان دینا
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ سمجھ کے زبان دینا سمجھ نہیں سکا

میں جان دے کر بچا لوں ایماں بُرا یہ میرا نہیں ہے سودا
مجھے بچانا خطا سے یا رب مجھے تُو اپنی امان دینا
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ٹھیک لیکن دونوں مصرعوں میں انہیں الفاظ کی ترتیب بدل کر دیکھو شاید کچھ بہتر صورت ملے

یہاں پہ رہ کر کریں گے جو بھی حساب دینا پڑے گا اُس کا
تمہیں بنانا پڑے گی عادت خطا پہ اپنی دھیان دینا
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ دھیان محض 'دان' تقطیع ہو گا

اگر کسی کو امان دو گےخدا سے اُس کا اجر ملے گا
کسی کو کھانا کسی کو پانی کسی کو اپنا مِلان دینا
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ اجر کے ج پر جزم ہے

نہ ظلم ارشد کرے کسی پر نہ ظلم ہوتا وہ دیکھ پائے
نہ ظلم سہنا کبھی کسی کا سدا ہی حق کی اذان دینا
.... حق کی اذان محاورہ نہیں ظلم سے تعلق بھی سمجھ میں نہیں آتا جو تین تین بار استعمال ہوا ہے

 

[ارشد چوہدری]

اصلاح کے بعد الف عین
-----------------
خدا کے بندوں سے پیار کرنا، اُسی کے رستے میں جان دینا
اگر ہو خدشہ کہ دل دُکھیں گے، کبھی نہ ایسا بیان دینا
------------------
کرو جو وعدہ کرووہ پورا ، یہی تو فرمان ہے خدا کا
اگر نبھانا تمہیں ہو مشکل ، کبھی نہ اپنی زبان دینا
---------------------
بچا لوں ایماں جو جان دے کر ،بُرا نہ ہو گا مرا یہ سودا
مجھے بچانا خطا سے یا رب مجھے تُو اپنی امان دینا
----------------
یہاں پہ رہ کر کریں گے جو بھی ،حساب دیناپڑے گا اس کا
سدا ہی دنیا میں گُم نہ رہنا ،خطا پہ اپنی بھی دھیان دینا
--------------
اگر کسی کو امان دو گے ،خدا سے اس کی جزا ملے گی
کسی کو خھانا کسی کو پانی کسی کو اپنا مِلان دینا
----------------
نہ ظلم ارشد کرے کسی پر نہ ان پہ ہوتا وہ دیکھ پائے
نہ ظلم سہنا کبھی کسی کا ، سدا ہی حق کو اُٹھان دینا
--------------------------

 

[الف عین]

اصلاح کے بعد الف عین

کیا اور بھی بگڑ گئے!

 

[ارشد چوہدری]

محترم اگر یہ بالکل غلط ہے تو اس کو چھوڑ ہی دیتا ہوں

 

[الف عین]

مذاق برطرف، اب اصلاح کی طرف
خدا کے بندوں سے پیار کرنا، اُسی کے رستے میں جان دینا
اگر ہو خدشہ کہ دل دُکھیں گے، کبھی نہ ایسا بیان دینا
------------------ اب بھی دونوں مصرعوں میں ربط محسوس نہیں ہو رہا

کرو جو وعدہ کرووہ پورا ، یہی تو فرمان ہے خدا کا
اگر نبھانا تمہیں ہو مشکل ، کبھی نہ اپنی زبان دینا
--------------------- اگر نبھانا ہو تم کو مشکل... بہتر ہو گا، درست

بچا لوں ایماں جو جان دے کر ،بُرا نہ ہو گا مرا یہ سودا
مجھے بچانا خطا سے یا رب مجھے تُو اپنی امان دینا
---------------- محض خطا کہا جائے تو پھر شعر دو لخت ہو جاتا ہے کفر اور شرک سے بچانے کی بات کی جائے تو ربط بنتا ہے
میں بچ سکوں کفر سے خدایا
باقی مصرعے درست

یہاں پہ رہ کر کریں گے جو بھی ،حساب دیناپڑے گا اس کا
سدا ہی دنیا میں گُم نہ رہنا ،خطا پہ اپنی بھی دھیان دینا
-------------- ایک ہی خطا ؟
خطاؤں پر اپنی دھیان دینا
ایک امکان ہے لیکن 'بھی' کی ضرورت بھی ہے

اگر کسی کو امان دو گے ،خدا سے اس کی جزا ملے گی
کسی کو خھانا کسی کو پانی کسی کو اپنا مِلان دینا
---------------- ملان سمبھ نہیں سکا۔ پہلے بھی لکھنا چاہا تھا لیکن محض اجر کی غلطی کی نشاندہی کر کے چھوڑ دیا

نہ ظلم ارشد کرے کسی پر نہ ان پہ ہوتا وہ دیکھ پائے
نہ ظلم سہنا کبھی کسی کا ، سدا ہی حق کو اُٹھان دینا
------------- حق کے ساتھ باطل کا میل ہے، ظلم کا نہیں حق کو اٹھان دینے کے ساتھ باطل کے آگے نہ جھکنے کی بات ہونی تھی، نہ کہ بار بار ظلم کی

 

[الف عین]

محترم اگر یہ بالکل غلط ہے تو اس کو چھوڑ ہی دیتا ہوں

مذاق سمجھ نہیں سکے شاید

 

[فلسفی]

اصلاح کے بعد الف عین

ارشد بھائی آپ کے اس جملے پر سر نے ازراہ تفنن کہا کہ کیا وہ مزید بگڑ گئے ہیں؟

آپ کا جملہ یوں ہونا چاہیے تھا۔ کہ سر الف عین، اصلاح کے بعد غزل حاضر ہے، جبکہ آپ کے جملے سے ایسا تاثر پیدا ہوا کہ جیسے سر بذات خود اصلاح کے بعد۔

 

[ارشد چوہدری]

ہاں واقعی میرا اس طرف دھیان نہیں گیا۔بلکہ میرا خیال اس طرف چلا گیا کہ شائد میرے محترم کسی وجہ سے ناراض ہو گئے ہیں تبھی انہوں نے اصلاح شدہ غزل چیک ہی نہیں ۔ بحرحال دونوں احباب کا شکریہ۔ میں یہ افورڈ نہیں کر سکتا کہ کوئی مجھ سے ناراض ہو ۔ وہ تو میرے استاد ہیں اور میرےدل میں ان کا بہت احترام ہے۔

 

[ارشد چوہدری]

شکریہ محترم ، دونوں غزلوں کی کل تصحیح کروں گا ۔ آج ایک نئی پوسٹ کی ہے اسے دیکھ لیں۔