اس شہر میں اب شورِ سگاں کیوں نہیں اٹھتا - سبط علی صبا

[ظفری]

اس شہر میں اب شورِ سگاں کیوں نہیں اٹھتا
آباد مکاں ہیں تو دھواں کیوں نہیں اٹھتا​

اٹھتے ہیں چمکنے کے لئے ننھّے سے جگنو
سورج! کوئی آشوبِ جہاں کیوں نہیں اٹھتا​

زندہ ہے ابھی شہر میں فن تیشہ گری کا
بازو ہیں تو پھر سنگِ گراں کیوں نہیں اٹھتا​

کیا رزق فقیروں کا فرشتوں میں بٹے گا
منصف کوئی اس خاک سے یاں کیوں نہیں اٹھتا​

تینتیس بہاروں کا ثمر چکھ کے بھی مجھ سے
دو چار قدم رختِ جہاں کیوں نہیں اٹھتا​

شہرت کی کمیں گاہوں میں قد ناپنے والو!
تم سے کبھی غیرت کا نشاں کیوں نہیں اٹھتا​

رستے میں ابھی ریت کی دیوار کھڑی ہے
راوی ترا سیلابِ جواں کیوں نہیں اٹھتا
سبط علی صبا​

 

[فلک شیر]

بہت اچھے ظفری بھائی.....

 

[نایاب]

بہت خوب حسب حال شراکت
تینتیس بہاروں کا ثمر چکھ کے بھی مجھ سے
دو چار قدم رختِ جہاں کیوں نہیں اٹھتا

33 سے گزر 65 تک پہنچ چکے مگر " ہنوز منزل دور "

 

[سید زبیر]

واہ
کیا رزق فقیروں کا فرشتوں میں بٹے گا
منصف کوئی اس خاک سے یاں کیوں نہیں اٹھتا
بہت خوب

 

[طارق شاہ]

ظفری صاحب !
بہت خوب ومربوط کلام کے لئے تشکّر اور ڈھیر ساری داد
بہت شاد رہیں

 

[فرخ منظور]

دیوا کیا گری میرے خستہ مکان کی
لوگوں نے میرے صحن میں رستے بنا لیے
(سید سبط علی صبا)
سید سبط علی صبا کا مجموعۂ کلام "ابرِ سنگ" ڈاؤنلوڈ کریں۔

http://www.scribd.com/doc/48274462/Abr-e-Sang

 

[مدیحہ گیلانی]

زندہ ہے ابھی شہر میں فن تیشہ گری کا
بازو ہیں تو پھر سنگِ گراں کیوں نہیں اٹھتا۔
واہ لاجواب انتخاب ہے۔