امیر مینائی اس کی حسرت ہے جسے دل سے مٹا بھی نہ سکوں

[نظام الدین]

اس کی حسرت ہے جسے دل سے مٹا بھی نہ سکوں
ڈھونڈنے اس کو چلا ہوں جسے پا بھی نہ سکوں
ڈال کر خاک مرے خوں پہ قاتل نے کہا
کچھ یہ مہندی نہیں میری کہ مٹا بھی نہ سکوں
ضبط کمبخت نے اور آکے گلا گھونٹا ہے
کہ اسے حال سناؤں تو سنا بھی نہ سکوں
اس کے پہلو میں جو لے جا کے سلادوں دل کو
نیند ایسی اسے آئے کہ جگا بھی نہ سکوں
نقشِ پا دیکھ تو لوں لاکھ کروں گا سجدے
سر مرا عرش نہیں ہے کہ جھکا بھی نہ سکوں
اس طرح سوئے ہیں سر رکھ کے مرے زانوں پر
اپنی سوئی ہوئی قسمت کو جگا بھی نہ سکوں
(امیر مینائی)​

 

[ملک عدنان احمد]

ہائے ہائے۔۔۔۔
؎اس کے پہلو میں جو لے جا کے سلادوں دل کو
نیند ایسی اسے آئے کہ جگا بھی نہ سکوں