اس گھٹن کے عالم میں، حق نہیں نہاں رکھنا

[اِبنِ اُمید]

------------------------------------------------------------------------------
اس گھٹن کے عالم میں، حق نہیں نہاں رکھنا
لب اگر سلے بھی ہوں، جاری یہ بیاں رکھنا

تم فقط ہی لفظوں کے، بت نہیں کھڑے کرنا
ایک سچ ہنر کرنا، حرف حرف جاں رکھنا

ہم کو تو نہیں آتے، طور بزم شاہی کے
جرم ہوگیا دیکھو، منہ میں اب زباں رکھنا

عزم کے چراغوں کو خوں سے زندگی دینا
اور ہر ایک منزل پہ، راہ کا گماں رکھنا

تم جنون ساحل پہ، کشتیاں جلادینا
واپسی کی اُمیدیں ، نہ کوئی نشاں رکھنا

زہر کے پیالے کا، گھونٹ گھونٹ پی لینا
آگ میں اُتر جانا، سر کو آسماں رکھنا

ஜ۩۞۩ஜ اِبنِ اُمید ஜ۩۞۩ஜ
http://www.facebook.com/ibn.e.umeed

 

[پپو]

زبردست کلام ہے جی شکریہ

 

[فاروق درویش]

برادر اس کلام کی بحر بتانا پسند کریں گے؟

تم فقط ہی لفظوں کے، بت نہیں کھڑے کرنا ؟

 

[فاروق درویش]

• • برادرمحترم آصف شفیع صاحب انتہائی ممنون ہوں کہ آپ نے شفقت فرما کر بحر بتا دی اور اس غزل کو قابل ِ داد ہونے کی سند سے بھی نوازا ۔۔۔۔۔۔۔۔۔ آپ کا ،،جاری ،، اور ،، نہ،، کے بارے اعتراض کے بارے عرض کروں گا۔۔۔۔۔۔۔۔ میرے مطابق ،، جاری ،، درست باندھا گیا ہے، ،، ی،، درست گرائی گئی ہے اور ،، نہ،، بہت سے شعرا اور اساتذہ نے کبھی کہیں دو حرفی بھی باندھا ہے ۔۔۔۔۔۔۔۔۔ مگر میں ان دونوں مصرعوں کو نہیں سمجھ پایا ، اس غزل کے خالق خود تو اس پوسٹ پر نہیں آئے چلیں آپ ہی بتا دیجئے ، مجھ جیسے مبتدی کا بھلا ہو جائے گا۔۔۔۔۔۔۔تم فقط ہی لفظوں کے، بت نہیں کھڑے کرنا ۔۔۔۔۔۔۔ ،،تم فقط ہی ،، ۔۔۔ مجہول سا ہے کوئی معنی نہیں دے پا رہا فقط کے بعد ،، ہی ،، کوئی معنی نہیں دے رہا ۔۔۔۔۔۔۔ فقط سے پہلے ،، ہی،، تو پڑھا اور سنا ہے مگر فقط کے بعد ہی کیا معنی دے رہا ہے؟ میے خیال میں اس ،، ہی ،، سے پورے مصرع کو مبہم اور مجہول سا بنا کر رکھ دیا ہے ۔۔۔۔۔۔۔ تم جنون ساحل پہ، کشتیاں جلادینا ۔۔۔۔۔۔۔ جنون ِ ساحل کی ترکیب ہے یا جنون ساحل ۔۔۔۔۔ دونوں صورتوں میںمصرع مبہم ہے ۔۔۔۔۔۔ ایک سچ ہنر کرنا، حرف حرف جاں رکھنا ۔۔۔۔ اس مصرعے میں شاعر کیا کہنا چاہتا ہے ۔۔۔۔۔ اور ہر ایک منزل پہ، راہ کا گماں رکھنا ۔۔۔۔۔۔۔۔۔ یہاں پہلے واؤ پھر الف گرایا گیا ہر پھر ،،پہ،، کو فا میں باندھا گیا ۔۔۔۔۔۔۔ دوسرے ہر راہ پر منزل کا گماں تو سمجھ میں آتا ہے لیکن ہر منزل پی راہ کا گماں ۔۔۔۔۔۔ میرے جیسے ناقص العلم طالب علم کیلئے ناقابل ِ سمجھ ہے ۔۔۔۔۔۔ غزل صرف بحر کی بندش ، اوزان پورے کرنے یا صرف قافیہ پیمائی کا نام نہیں ۔۔۔۔۔۔ مصرعوں میں الفاظ کا ربط ، زبان کی پابندی اور معنوی اعتبار سے ابہام سے اجتناب بھی ضروری ہے ۔۔۔۔۔۔ میرا موقف ہے کہ اگر ہم نئے لکھنے والوں کی تخلیقات پر مثبت اور مخلصانہ تنقید نہیں کریں گے توان کا سخن کیونکر نکھرے گا ۔۔۔۔۔ فیس بک پر اسی فیصد لوگ بے بحری بے وزنی شاعری کر رہے ہیں اور تمام اہل ِ علم ان کی اصلاح کی بجائے الٹا ان پر واہ واہ کر کے شعر و سخن کا جنازہ نکال رہے ہیں ۔۔۔ میں ایسے قتل ِ سخن کا حصہ نہیں بننا چاہتا ۔۔۔۔۔۔۔ سو میرے مطابق اس غزل کے بیشتر اشعارمعنوی اعتبار سے مبہم ہیں سو میری ناقص سمجھ میں نہیں آ سکے ۔۔۔۔۔۔۔۔۔۔ باقی برادر عبید صاحب، برادر وارث صاحب اور برادر محمود مغل صاحب جیسے اہل علم اس فورم پر موجود ہیں جن کی عالمانہ رائے کو میں مستند اور مقدم سمجھتا ہوں ، ان کے تجزئے کا انتظار کروں گا ۔۔۔۔۔۔۔۔۔۔ میرے اعتراضات کا مقصد تعمیری ہے کہ علمی بحثیں سخن نکھارنے کیلئے ضروری ہیں اوران سے سیکھنے اور سکھانے کا عمل جاری رہنا چاہیے اور مجھے آپ جیسے اہل علم دوسوں سے بہت کچھ سیکھنا ہے ۔۔ والسلام ۔۔۔۔۔۔۔۔

 

[محمد امین]

آصف شفیع صاحب کی پوسٹ یہاں نظر نہیں آرہی۔۔۔

 

[فاتح]

عمدہ کوشش ہے۔
بحر: ہزج مثمن اشتر (فاعلن مفاعیلن فاعلن مفاعیلن)

 

[محمد امین]

شکریہ فاتح بھائی مفید معلومات کا امید ہے کہ فورم کی تزئینِ نو کے بعدآپکی دید کا شرف اکثر حاصل رہے گا

 

[فاتح]

ان شاء اللہ محمد امین صاحب