تاسف اشک ما بر خاک پاک او رساں

[شاکرالقادری]

 

[الف نظامی]

اے عاشقوں کے قافلہ سالار السلام
دینِ محمدی کے نگہدار السلام

عالم فروز و مطلعِ انوار السلام
ضو ریز و ضو فشاں و ضیا بار السلام

حسن و جمالِ سیدِ ابرار السلام
آئینہ دارِ عظمتِ کردار السلام

اللہ کی رضا کے طلب گار السلام
اے رہ نورد جادہ دشوار السلام

بازو و دستِ حیدرِ کرار السلام
اسلام کے معین و مددگار السلام

حق آشنا و محرمِ اسرار السلام
اے جان و دل سے حق کے خریدار السلام

تصویرِ شوق و جلوہ سرشار السلام
عزم آفرین و صاحبِ کردار السلام

حُسنِ تمام ، حسن کے شہکار السلام
باغِ رسول کے گلِ بے خار السلام

نورِ نگاہِ مرتضوی ، جانِ سیدہ
تسکینِ روحِ عابدِ بیمار السلام

اے روحِ پاک سیدِ مظلوم ! الصلوۃ
مظلومِ تیغ و خنجرِ خونخوار السلام

تیغِ علی و خنجر برانِ مصطفے
اے رب ذوالجلال کی تلوار السلام

اے عشق کے امام ، محبت کے پیشوا
صدر الصدورِ ملتِ احرار السلام

خود دار و خود شناس و خود آگاہ و خود نگر
حق بین و حق نما و حق آثار السلام

تو اور قید لشکرِ شمر و یزید میں؟
تو اور بندِ غم میں گرفتار السلام

جو زخم بھی لگے ترے جسمِ لطیف پر
وہ زخم میرے دل کا ہیں آزار السلام

تھا فطرتا بلند ، مذاقِ نظر ترا
حق کے نقیب ، حق کے علمدار السلام

پڑھتے ہیں تجھ پہ لوگ ہر اک شہر میں درود
کہتے ہیں تجھ کو کوچہ و بازار السلام

تڑپا رہی ہے مجھ کو بھی مظلومیت تری
میں بھی ہوں دل فِگار و عزادار السلام

از حافظ مظہر الدین مظہر رحمۃ اللہ علیہ