اللہ کے نزدیک جن کی شان بڑھتی جاتی ہے غزل نمبر 109 شاعر امین شارؔق

[امین شارق]

الف عین سر
فاعِلاتن فاعِلاتن فاعِلاتن فاعِلن

اللہ کے نزدیک جن کی شان بڑھتی جاتی ہے
مشکل ایسے بندوں کی ہر آن بڑھتی جاتی ہے

شیخِ کامل طے کراتا ہے منازل عشق کی
ذکرِ حق سے قوتِ ایمان بڑھتی جاتی ہے

جوں جوں کرتا ہوں تلاوت دل کو ملتا ہے سکوں
دل میں میرے عظمتِ قُرآن بڑھتی جاتی ہے

عشق میں حاصل نہیں کچھ، جاننے کے باوجود
تیری نادانی دلِ نادان بڑھتی جاتی ہے

پہلے پہلے راج کرتا ہے سمندر پر سکُوت
دھیرے دھیرے سختیِ طوفان بڑھتی جاتی ہے

قبر کی مٹی بھرے گی پیٹ مر جانے کے بعد
زندہ رہ کر خواہشِ انسان بڑھتی جاتی ہے

ایسا لگتا ہے کہ مجھ سے خوش بہت ہے رب مرا
گھر میں میرے آمدِ مہمان بڑھتی جاتی ہے

حضرتِ واعظ بھی شارؔق شعر سنتے ہیں مرے
آج کل ان سے مری پہچان بڑھتی جاتی ہے​

 

[صابرہ امین]

بہت خوب!!

 

[الف عین]

اس غزل میں " جات ہے" ردیف تقطیع ہو رہی ہے جس میں بہت کراہت ہے
پہلا مصرع ہی بحر سے خارج ہے اللہ کی جگہ محض لاہ تقطیع ہو رہا ہے، شاید کسی اور مصرع میں بھی ایسا ہی ہو۔ غور سے نہیں دیکھا ہے ابھی، کہ ردیف اور زمین پر ہی گاڑی اٹک گئی ہے!

 

[امین شارق]

بہت خوب!!

شکریہ صابرہ صاحبہ۔۔

 

[زیک]

امین شارق مان لیں کہ شاعری آپ کے بس کا روگ نہیں اور کوئی بہتر کام کریں۔ اگر سینکڑوں غزلوں کی اصلاح کے بعد بھی معاملات نہیں سدھرے تو آئیندہ بھی امید کم ہی ہے۔

 

[صریر]

عشق میں حاصل نہیں کچھ، جاننے کے باوجود
تیری نادانی دلِ نادان بڑھتی جاتی ہے

غزل میں خیالات اچھے ہیں، لیکن قوافی شاید غلط ہو گئے ہیں۔
استاد محترم، کیا اضافت والے نون کو پورا باندھا جا سکتا ہے؟
الف عین

 

[امین شارق]

امین شارق مان لیں کہ شاعری آپ کے بس کا روگ نہیں اور کوئی بہتر کام کریں۔ اگر سینکڑوں غزلوں کی اصلاح کے بعد بھی معاملات نہیں سدھرے تو آئیندہ بھی امید کم ہی ہے۔

جس کا جیسا ظرف تھا اتنا ہی پہچانا مجھے

 

[زیک]

جس کا جیسا ظرف تھا اتنا ہی پہچانا مجھے

ہر تیسرے چوتھے دن ایک نئی غزل کی اصلاح کا فائدہ؟؟

 

[الف عین]

ہر تیسرے چوتھے دن ایک نئی غزل کی اصلاح کا فائدہ؟؟

پچھلی نوے سے زائد غزلوں کو تو میں نے اصلاح کے قابل ہی نہیں سمجھا تھا، بس دو چار فاش اغلاط کی طرف اشارہ کر دیا تھا، امین شارق حیرت انگیز طور پر اچانک ایسی غزلیں کہنے لگے کہ اصلاح کو دل چاہنے لگا! سو پچھلی دس پندرہ غزلیں اصلاح کی گئی ہیں اگرچہ اب بھی پچھلی اغلاط دہرا دیتے ہیں شارق لیکن کم کم۔ یہ غزل پچھلے گروپ کی غزلوں کی طرح ہی ہے، اس لئے اصلاح کی جگہ ردیف اور اس کے نتیجے میں غزل ہی بدلنے کا کہا جا رہا ہے ان سے!
صریر اگر قافیہ ہی معلنہ ن کا مقرر کردہ ہو تو دلِ نادان بھی قبول کیا جا سکتا ہے

 

[امین شارق]

الف عین سر بہت شکریہ آپکا کہ آپ اصلاح کرتے ہیں یعنی اب یہ ٹرین پٹری پر آنے لگی ہے میری یہی کوشش ہوگی کہ اغلاط سے بچنے کی کوشش کروں۔۔۔

 

[محمد عبدالرؤوف]

@امین شارق حیرت انگیز طور پر اچانک ایسی غزلیں کہنے لگے کہ اصلاح کو دل چاہنے لگا

شاید شارق بھائی نے عروض کو جاننے کے لیے تگ و دو ضرور کی ہے

 

[امین شارق]

الف عین سر
اس غزل کی ردیف اگر بڑھتی جاتی ہے کی بجائے ہوتی ہے فزوں کری جائے تو کیا یہ ٹھیک رہے گا۔۔

 

[الف عین]

ہوتی ہے فزوں ردیف میں بھی روانی کی کمی ہے۔ اس سے "ہوتی جائے ہے"، قدیمی اردو کی ردیف بہتر اور رواں ہے