ولی دکنی الٰہی! رکھ مجھے تو خاکِ پا اہلِ معانی کا ۔ ولی دکنی

[فرخ منظور]

غزل

الٰہی! رکھ مجھے تو خاکِ پا اہلِ معانی کا
کہ کھلتا ہے اسی صحبت سے نسخہ نکتہ دانی کا

کیا یک بات میں واقف مجھے رازِ نہانی کا
لکھوں غنچے اُپر حرف اُس دہن کی نکتہ دانی کا

کتابت بھیجنی ہے شمع بزمِ دل کوں اے کاتب
پرِ پروانہ اوپر لکھ سخن مجھ جاں فشانی کا

عزیزاں بعد مرنے کے نہ پوچھو تم کہ تنہا ہوں
لکھا ہوں پردۂ دل پر خیال اس یارِ جانی کا

چھپا کر پردۂ فانوس میں رخ شمع گریاں ہے
سنیا ہے جب سوں آوازہ تری روشن بیانی کا

پرت کی بزم میں تا سرخ روئی مجھکو ہو حاصل
نین سوں اپنے دے ساغر شرابِ ارغوانی کا

بجا ہے گر کرے پرواز رنگِ چہرۂ عاشق
ہوا ہے ذوق موہن کو لباسِ زعفرانی کا

ترے مکھ کی صفائے حیرت افزا لکھ سکے کیوں کر
قلم ہے جوہرِ آئینۂ ناصافِ مانی کا

رہے وہ مُو کمر جیوں دیدۂ تصویر حیراں ہو
لکھے گر خامۂ موسوں بیاں مجھ ناتوانی کا

شرابِ جلوۂ ساقی سوں مت کر منع اے زاہد
یہی ہے مقتضا عالم میں ہنگامِ جوانی کا

ولی جن نے نہ باندھا دل کوں اپنے نونہالوں سوں
نہ پایا اُن نے پھل ہرگز جہاں میں زندگانی کا

(ولی دکنی)

 

[محمد وارث]

واہ واہ بہت خوب۔ شکریہ فرخ صاحب شیئر کرنے کیلیے۔

 

[فرخ منظور]

واہ واہ بہت خوب۔ شکریہ فرخ صاحب شیئر کرنے کیلیے۔

پسند فرمانے کا بہت شکریہ وارث صاحب! اب اس محفل میں شاعری سے دلچسپی رکھنے والے دو یا تین لوگ ہی رہ گئے ہیں۔

 

[محمد وارث]

یہ بھی غنیمت ہے قبلہ بقولِ انشاءاللہ خان انشاء

بھلا گردش فلک کی چین دیتی ہے کسے انشا
غنیمت ہے کہ ہم صورت یہاں دو چار بیٹھے ہیں

 

[فاتح]

بہت خوبصورت انتخاب ہے قبلہ۔
لیجیے صاحب اس بہانے ہم بھی انگلی پر لہو لگا کر ان دو چار شہیدوں میں نام لکھواتے چلیں۔

 

[محمد وارث]

آپ کا نام نامی تو قبلہ زینتِ فہرست ہے

 

[کاشفی]

بہت شکریہ جناب سخنور صاحب۔۔بہت عمدہ غزل شیئر کی ہے جناب نے۔۔

 

[فرخ منظور]

بہت خوبصورت انتخاب ہے قبلہ۔
لیجیے صاحب اس بہانے ہم بھی انگلی پر لہو لگا کر ان دو چار شہیدوں میں نام لکھواتے چلیں۔

واہ واہ! آپ آئے تو محفل جگمگا اٹھی۔ آیا کرو ادھر کو مری جاں کبھی کبھی

 

[فرخ منظور]

بہت شکریہ جناب سخنور صاحب۔۔بہت عمدہ غزل شیئر کی ہے جناب نے۔۔

بہت شکریہ کاشفی صاحب۔ اگر آپ جیسے احباب نہ ہوں تو مجھے بھی شاید کوئی کلام پوسٹ کرنے کی تحریک نہ ہو۔