الہی سینہ ء صحرا میں کس کا سوز پنہاں تھا

[الف نظامی]

الہی سینہ ء صحرا میں کس کا سوز پنہاں تھا
غبار ناقہ ء لیلی کا ہر ذرہ پریشاں تھا

گل و بلبل کا افسانہ بھی اک نیرنگ دوراں تھا
کوئی آتش بداماں کوئی آتش زیر داماں تھا

تصور ہی رہائی کا اسے دیوار زنداں تھا
اسیرِ دامِ الفت بھی عجب آزاد انساں تھا

دلِ نادان رازِ عشق سے واقف نہ تھا ورنہ
تیری چشمِ کرم تو قصہ ء مجنوں کا عنواں تھا

میری مدہوشیاں نا آشنا تھیں حدِ منزل سے
نہیں تو جستجو کا راستہ تا حدِ امکاں تھا

جنوں کی سلطنت میں عقلِ رہبر پا شکستہ تھی
جنوں خود قافلہ سالار خود ہی میرِ ساماں تھا

جہاں سے جانیوالا لکھ گیا خونی نوشتے میں
ہوس کافر تھی لیکن عشقِ صادق عین ایماں تھا

جسے پایا نہ دنیا نے وہ اس بت کی طبیعت تھی
نہ دیکھا جس کو عالم نے وہ شاکر کا گریباں تھا
(سید عبد الحمید شاکر نقوی البخاری)​