انتخابِ باقی صدیقی

[نوید صادق]

انتخابِ باقی صدیقی
کتاب: بارِ سفر
انتخاب: نوید صادق، احمد فاروق

 

[نوید صادق]

خبر کچھ ایسی اُڑائی کسی نے گاؤں میں
اُداس پھرتے ہیں ہم بیریوں کی چھاؤں میں

غموں کی بھیڑ میں اُمید کا وہ عالم ہے
کہ جیسے ایک سخی ہو کئی گداؤں میں

 

[نوید صادق]

تم زمانے کی راہ سے آئے
ورنہ سیدھا تھا راستہ دل کا

 

[نوید صادق]

دلوں میں فاصلہ اتنا نہیں تھا
زمانہ درمیاں آیا ہوا ہے

 

[نوید صادق]

کون اب دادِ سخن دے باقی
جس نے دو شعر کہے میر ہوا

 

[نوید صادق]

زندگی کی آس بھی کیا آس ہے
موجِ دریا پر دیا جلتا رہا

 

[نوید صادق]

یہ دوپہر، یہ پگھلتی ہوئی سڑک باقی
ہر ایک شخص پھسلتا ہوا نظر آیا

 

[نوید صادق]

اب تو وہ جی سکتا ہے
جس کا دل ہو پتھر کا

 

[نوید صادق]

ایک دیوار کی دوری ہے قفس
توڑ سکتے تو چمن میں ہوتے

 

[نوید صادق]

یوں بھی ہونے کا پتا دیتے ہیں
اپنی زنجیر ہلا دیتے ہیں

پہلے ہر بات پہ ہم سوچتے تھے
اب فقط ہاتھ اُٹھا دیتے ہیں

ایک دیوار اُٹھانے کے لئے
ایک دیوار گرا دیتے ہیں

 

[نوید صادق]

ان کا یا اپنا تماشا دیکھو
جو دکھاتا ہے زمانہ دیکھو

یا کسی پردے میں گم ہو جاؤ
یا اُٹھا کر کوئی پردہ دیکھو

دوستی خونِ جگر چاہتی ہے
کام مشکل ہے تو رستہ دیکھو

سادہ کاغذ کی طرح دل چپ ہے
حاصلِ رنگِ تمنا دیکھو

اپنی نیت پہ نہ جاؤ باقی
رخ زمانے کی ہوا کا دیکھو

 

[نوید صادق]

آئی وہ شاہ کی سواری
آؤ ہم تالیاں بجائیں

 

[نوید صادق]

داغِ دل ہم کو یاد آنے لگے
لوگ اپنے دئے جلانے لگے

اب تو ہوتا ہے ہر قدم پہ گماں
ہم یہ کیسا قدم اُٹھانے لگے

رخ بدلنے لگا فسانے کا
لوگ محفل سے اُٹھ کے جانے لگے

ایک پل میں وہاں سے ہم اُٹھے
بیٹھنے میں جہاں زمانے لگے

اپنی قسمت سے ہے مفر کس کو
تیر پر اُڑ کے بھی نشانے لگے

 

[نوید صادق]

کوئے آوارگاں میں ہم پر بھی
کوئی آوازہ کس گیا تو کیا

 

[نوید صادق]

گھر میں تھا دشت نوردی کا خیال
دشت میں آئے تو گھر یاد آیا

گر پڑے ہاتھ سے کاغذ باقی
اپنی محنت کا ثمر یاد آیا

 

[نوید صادق]

کشتیاں ٹوٹ گئی ہیں ساری
اب لئے پھرتا ہے دریا ہم کو

گھر کو یوں دیکھ رہے ہیں جیسے
آج ہی گھر نظر آیا ہم کو

یاد آئی ہیں برہنہ شاخیں
تھام لے اے گلِ تازہ ہم کو

لے گیا ساتھ اُڑا کر باقی
ایک سوکھا ہوا پتا ہم کو

 

[نوید صادق]

وفا کا زخم ہے گہرا تو کوئی بات نہیں
لگاؤ بھی تو ہمیں ان سے انتہا کا تھا

 

[نوید صادق]

زندگی جرم بنی جاتی ہے
جرم کی کوئی سزا ہے کہ نہیں

دوست ہر عیب چھپا لیتے ہیں
کوئی دشمن بھی ترا ہے کہ نہیں

 

[نوید صادق]

قدموں پہ بار ہوتے ہیں سنسان راستے
لمبا سفر ہے ہم سفراں بولتے رہو