انتہائے عشق میں یہ بھی کمال اُس نے کیا ::: نسیم سحر

[فرقان احمد]

انتہائے عشق میں ۔۔۔ یہ بھی کمال اُس نے کیا
ہجر میں میرے ہی جیسا اپنا حال اُس نے کیا

شوق سے پہلے تو مجھ کو ۔۔۔ پائمال اُس نے کیا
اور پھر میرے لیے ۔۔۔۔ اتنا ملال اُس نے کیا !

ہو گیا میں روبرو اُس شخص کے کیوں لاجواب!
کیا بتاؤں میں کہ مجھ سے کیا سوال اُس نے کیا

مٹ گئے خود اُس کے اپنے چہرے کے بھی کچھ نقوش
انتقاماً جب مجھے بے خدوخال ۔۔۔۔۔۔۔ اُس نے کیا!

بیچ کر اپنا لہو لایا تھا میں تو ۔۔۔۔۔۔ اک چراغ!
اور پھر اک دن ۔۔۔ ستاروں کا سوال اُس نے کیا!

زندہ ۔۔۔ رہنے کے لیے تازہ ہوا مانگی نسیمؔ ۔۔۔!
جب چلی تازہ ہوا ۔۔۔۔۔۔کتنا نڈھال اُس نے کیا​