ان پانیوں میں‌ خوب نہانے کو جی کرے - پرکاش فکری

[کاشفی]

غزل
(پرکاش فکری - ہندوستان)

ان پانیوں میں‌ خوب نہانے کو جی کرے
سارے دکھوں کا بوجھ بھلانے کو جی کرے

انجان سی صدائیں جو آتی ہیں دور سے
دیوانگی کے دشت میں جانے کو جی کرے

ان پربتوں کی چھاؤں میں سوئے سکوت کو
کر کے بلند چیخ ڈرانے کو جی کرے

بجھنے لگی ہے شام اندھیروں کی گود میں
ہر سمت ایک آگ لگانے کو جی کرے

وہ شخص جس سے روٹھ کے تنہا بہت ہوئے
اس کی گلی کی خاک اڑانے کو جی کرے

فکری یہ اختصار تو بے لطف سا رہا
قصہ کوئی طویل سنانے کو جی کرے

(بشکریہ: اردو انڈیا)​

 

[الف عین]

شکریہ کاشفی میرے دوست کی تخلیق پوسٹ کرنے کا۔ یہ صرف نام کے پرکاش ہیں، غیر مسلم نہیں۔ یہ محض اطلاع ہے کہ غلط فہمی ہو سکتی ہے۔

 

[عمران شناور]

بہت اچھی غزل شیئر کی ہے کاشفی صاحب۔ بہت شکریہ

 

[کاشفی]

شکریہ کاشفی میرے دوست کی تخلیق پوسٹ کرنے کا۔ یہ صرف نام کے پرکاش ہیں، غیر مسلم نہیں۔ یہ محض اطلاع ہے کہ غلط فہمی ہو سکتی ہے۔

شکریہ بابا جانی۔۔۔۔ غلط فہمی دور کرنے کے لیئے۔۔۔۔۔۔۔ جزاک اللہ۔

 

[dxbgraphics]

شکریہ بابا جانی۔۔۔۔ غلط فہمی دور کرنے کے لیئے۔۔۔۔۔۔۔ جزاک اللہ۔

ارے یار کون سی ان کی عمر 70 برس ہے کہ بابا جانی کہہ رہے ہیں

 

[الف عین]

میاں ڈی ایکس گرافکس، صرف 125 ماہ کم ہیں میری عمر میں۔۔۔

 

[dxbgraphics]

ایک سو پچیس ماہ کے لئے آپ کو بابا جانی کہنے پر بین لگا دیا جائے