فاروق احمد بھٹی
محفلین
او میلے او چِھنجاں او کوڈی وی پانی
اودِیسی خوراکاں تےاَتھری جوانی
تے بانہواں نوں پَھڑناں تےطاقت ازمانی
او مکھن تے روٹی تے او شَکر دا پانی
او آٹے نہ رے او پراتاں نہ رَئیاں
او گلاں نہ رَئیاں او باتاں نہ رَئیاں
مُونجی دی فَصل وَڈنی تے پَھنڈنی
کہواڑی تے رَمبی وی گھر بہہ کے چَھنڈنی
تے بُڈھرا او بابا تے بَن کے مُنڈاسہ
تے پھیرے سَواگہ کواسہ کواسہ
او پٹھیاں چہ طاقت خوراکاں نہ رَئیاں
او گلاں نہ رَئیاں او باتاں نہ رَئیاں
نہ پُوڈَر نہ سُرخی نہ لالی نوں لانا
تے کالے جئے بُرخے چہ وُوھٹی نے جانا
وَچھوڑا نہ سَیندی تے ڈھاواں پئی مارے
تے پِنڈ والے لوکی وی رُوون پے سارے
او لوکی او بَندے او جاچاں نہ رَئیاں
او گلاں نہ رَئیاں او باتاں نہ رَئیاں
نہ گاجر داحلوہ نہ فِرنی پکانی
تے جَنج نوں جلیبیاں تے چاء ای پلانی
تے چاء وِچ ہونا او شَکر دا مِٹھا
تے وُوھٹی سی لَمی تے لاڑا سی گِھٹا
او ڈولی او تَنبُو او کَناتاں نہ رَئیاں
او گلاں نہ رَئیاں او باتاں نہ رَئیاں
تے پِنڈ دے سُکولاں دا ہونا اے رَولا
نہ بوہا نہ چھنا نہ کوئی ہونا کَولا
تے پِیپَل دے بُوٹے دے تَھلے ای پَڑھنا
تے چھاویں وی بہناں تے دُھپے وی سَڑنا
تے پورے سُکول اِچ اِک ہونا ٹِیچَر
نہ چُونکی نہ دَریاں نہ ہونا فَرنیچر
او پَھٹیاں او قَلماں او دَواتاں نہ رَئیاں
او گلاں نہ رَئیاں او باتاں نہ رَئیاں
تے چَھپڑاں اِچ نہانا تے چُوپنے گَنّے
او پِنڈ دیاں بُوہڑاں او لُسّی دے چَھنّے
او مَایاں نہ رَئیاں او کَاتاں نہ رَئیاں
او گلاں نہ رَئیاں او باتاں نہ رَئیاں
تے شادی کرانی تے پُرانا سی وِیلا
تے پِنڈ وِچ لَگنا جیوٰیں کوٰئی مِیلا
تے ہَفتہ پَرونے وی پہلاں اِی آنے
سَیانے سی کَٹ تے بَوہتے سی یانے
پَرالی تے کھانی وَلیمے دی رُوٹی
تے بَوہتا سی شُورا تے اِک اِک بوُٹی
او لاڑے نہ رئیے او باراتاں نہ رَئیاں
او گلاں نہ رَئیاں او باتاں نہ رَئیاں
تے نہ بَلیڈ پریشر نہ گھِٹیاں اِچ پِیڑاں
او دِیسی دَوائیاں تے مَربّے ہریڑاں
او کُھواں دے پانی او بَرساتاں نہ رَئیاں
او گلاں نہ رَئیاں او باتاں نہ رَئیاں
تے ھَل شَل وانے تے ٹَگیاں دی جوڑی
او اَلسی دِیاں پِنیاں او گُڑھ والی روڑی
باَجرے دے ٹُوڈے او سُوغاتاں نہ رَئیاں
او گلاں نہ رَئیاں او باتاں نہ رَئیاں
تے اَکھ اِچ حَیا نالے عِزّت وی کَرنی
تے ووُھٹی وی گَل سَس سوہرے دی جَرنی
تے شاہ وِیلے اُٹھنا تے روٹی پکانی
تے سوَخْتے سوَخْتے مَدانی چلانی
تے مُنڈیاں نے مَنگنی راتاں نوں لوڑی
نہ وَجنے کوئی ڈاکے نہ ہونی کوئ چوری
او چَنگِیاں سویراں او راتاں نہ رَئیاں
او گلاں نہ رَئیاں او باتاں نہ رَئیاں
نہ کُوپاں کلیِشن نہ ہونے کوئی تھانے
تے پَریا پَچیتاں نے رَپھڑ مکانے
تےبُوہڑ ہیٹھاں بَندیاں نے مَنجھے وَچھانے
تے گامے تےماجے نے حُقے پَخانے
تے اِک مُٹھ ہونا نہ ہونا کوئی پرایا
او بے بے او ماسی او چاچا او تایا
او گَلاں اِچ خُوشبو مٹھاساں نہ رَئیاں
او گلاں نہ رَئیاں او باتاں نہ رَئیاں
تے کِھیڈاں اِچ گُڈیاں پٹولے شَٹاپُو
نہ ہونے کوئی فیشن نہ کُڑیاں چالاکو
نہ موڑے کوئی بےبے نہ ٹھاکے کوئی باپو
لیانا پَرُونے لئی حُقہ تمباکو
او گُلیاں او ڈَنڈے او شاٹاں نہ رَئیاں
او گلاں نہ رَئیاں او باتاں نہ رَئیاں
تے پِنڈ دیاں نوواں نے کُنڈھ شُنڈ کَڈنے
بچے وی سانبنے تے پَٹھے وی وَڈنے
وَڈھ کے پَھٹےتے سِر تے وی لَیانے
کَر کے گَتاوا تے ڈََنگراں نُوں پانے
تےسَس نال رَل کے تےٹَکلے پَتھانے
چَھئیں چَھئیں مَہینی کَپڑے سَیوانے
او مُوہلا او اُکھلی او چَکی او دانے
وَیاواں دی پاجی او پتاسے مَخانے
وَئ بُڈھیاں سی چَنگِیاں بَندے سی پولے
نہ لِہنگا نہ کَگھرے نہ کُڑتی نہ چَولے
او دَرزی او قینچی او کاٹاں نہ رَئیاں
او گلاں نہ رَئیاں او باتاں نہ رَئیاں
او کَھڈیاں اوگَلیچے او پونی او تَنداں
تے مِٹی دے کوٹھے تے کَچِیاں سی کَنداں
تے کَنداں تےوانے او مایاں نے بُوٹے
پَرالی دے بِنے تے حُقے دے سُوٹے
او پِیپل دریکاں او امباں دے بُوٹے
او شَرماں حَیاواں او پِینگاں دے چُوٹے
او تعلق امیداں او آساں نہ رَئیاں
او گلاں نہ رَئیاں او باتاں نہ رَئیاں
او کَچّا برانڈا او لَکڑ دی باری
او سِرکی او کانے او کَچی پَساری
پساری اِچ ہونا او مِٹّی دا چُولہا
اوپاتھی او ٹَکلے او دُھویں دا بُھلا
پساری وی کُھلی تے ویڑا وی کُھلا
ماجا کوئی گاما کوئی دِینا کوئی بُلھا
اوخوشیاں او عیداں شَبراتاں نہ رَئیاں
او گلاں نہ رَئیاں او باتاں نہ رَئیاں
نہ مُوٹر نہ گَڈیاں نہ رَکشے نہ کاراں
او کَچھ وِچ جُتی تے لَمیاں اُوڈاراں
اوکُھلیاں ہواواں او موجاں بہاراں
نہ لَبھداکوئی مَیرا نہ لَبھدی کوئی رُوئی
بَسینتر نہ ڈبراں نہ چَھپڑ نہ چُوئی
او ڈِیکاں دے پانی او ٹَھاٹاں نہ رَئیاں
او گلاں نہ رَئیاں او باتاں نہ رَئیاں
تے عارضی او وِیلے میں کِیویں پُلاواں
تے پِشلیاں یاداں دے دِیوے جَلاواں
او چِھٹیاں لفافے او ڈاکاں نہ رَئیاں
او گلاں نہ رَئیاں او باتاں نہ رَئیاں
شہزاد احمد عارضی ۔۔۔ ظفروال
ساڈے جہئے بندے اُنج وی حال دی بجائے لنگھے ویلے وچ وسدے نیں تے اوس دا سُچا پن ڈھونڈدے رہندے نیں 
