فلک شیر
محفلین
اُچیاں ٹِبیاں تے میں بیٹھا
مُٹھیوں دُھوڑ اڈاواں
مُٹھیوں کِر کے میں وی کدھرے
دُور کِتے اُڈ جاواں
کِسے بسنتی پھُل دی چادر تے
جا کے سوں جاواں
ہرے کچُور پتر دی پھُٹ اِچ
اکھّ نال حوض بناواں
عُمراں دی میں پیاس مِٹاواں
تے ہریاں ہو جاواں
اُچیاں ٹِبیاں تے میں بیٹھا
مُٹھیوں دُھوڑ اُڈاواں
مُٹھیوں کِر کے میں وی کدھرے
دُور کِتے اُڈ جاواں
اُڈ کِسے عاشق دی قبرے
میں جا کے بہہ جاواں
پھِکی مہندی والے ہتھ دے
پائے چاؤل میں کھاواں
ٹُٹی چُنجھ نال کڈھ دو قبراں
دوہاں وچ سوں جاواں
اُچیاں ٹِبیاں تے میں بیٹھا
مُٹھیوں دُھوڑ اُڈاواں
مُٹھیوں کِر کے میں وی کدھرے
دُور کِتے اُڈ جاواں
کِسے جوگی دے موڈھے بہہ کے
پردیساں ول جاواں
اُس جوگی دے تِلک دی سُرخی
نِیلے ہوٹھیں لاواں
اُس سُرخی نال سُورج بالاں
جِیون نوں رُشناواں
اُچیاں ٹِبیاں تے ۔۔۔۔۔۔
(افضل ساحر)
