اک ترے خواب کی پہچان ہماری آنکھیں

[الف نظامی]

نعتِ رسول اکرم
خواب میں زیارتِ رسول اکرم صلی اللہ علیہ و آلہ وسلم سے شرف یاب ہونے کے بعد
( از شازیہ اکبر ، اٹک )

اک ترے خواب کی پہچان ہماری آنکھیں
ہوگئیں فخرِ دل و جان ہماری آنکھیں

رکھ کے آنکھوں میں تجھے موند لیں اپنی پلکیں
یوں رہیں صورتِ جز دان ہماری آنکھیں

اب ترے بعد کسی اور کو کیسے دیکھیں
ہوگئیں تجھ پہ تو قربان ہماری آنکھیں

جانے کس عرضِ تمنا نے ثمر بار کیا
کس عبادت کا ہیں فیضان ہماری آنکھیں

جیسے صحرا کی کڑی دھوپ میں پیاسے راہی
اس طرح رہتی تھیں ویران ہماری آنکھیں

اب انہیں گردِ زمانہ سے رکھیں گے محفوظ
اب ہیں سرمایہ ایمان ہماری آنکھیں

( صلی اللہ علیہ و آلہ وسلم )

سہ ماہی فروغِ نعت شمارہ 0 سے لیا گیا کلام​

 

[عاطف بٹ]

رکھ کے آنکھوں میں تجھے موند لیں اپنی پلکیں
یوں رہیں صورتِ جزدان ہماری آنکھیں​

بہت خوبصورت ہدیہء عقیدت ہے۔
شیئر کرنے کے لئے بہت شکریہ

 

[زبیر مرزا]

سبحان اللہ - جزاک اللہ

 

[نایاب]

سبحان اللہ
بلاشبہ جذب سے بھرپور ہے یہ کلام ۔۔۔۔۔۔۔۔۔