اک خواب نیند کا تھا سبب، جو نہیں رہا - عرفان ستار

[شمشاد]

اک خواب نیند کا تھا سبب، جو نہیں رہا
اُس کا قلق ہے ایسا کہ میں سو نہیں رہا

وہ ہو رہا ہے جو میں نہیں چاہتا کہ ہو
اور جو میں چاہتا ہوں وہی ہو نہیں رہا

نم دیدہ ہوں، کہ تیری خوشی پر ہوں خوش بہت
چل چھوڑ، تجھ سے کہہ جو دیا، رو نہیں رہا

یہ زخم جس کو وقت کا مرہم بھی کچھ نہیں
یہ داغ، سیل ِ گریہ جسے دھو نہیں رہا

اب بھی ہے رنج، رنج بھی خاصا شدید ہے
وہ دل کو چیرتا ہوا غم گو نہیں رہا

آباد مجھ میں تیرے سِوا اور کون ہے؟
تجھ سے بچھڑ رہا ہوں تجھے کھو نہیں رہا

کیا بے حسی کا دور ہے لوگو۔ کہ اب خیال
اپنے سِوا کسی کا کسی کو نہیں رہا
(عرفان ستار)

 

[طارق شاہ]

کیا بے حسی کا دور ہے لوگو، کہ اب خیال
اپنے سِوا کسی کا کسی کو نہیں رہا
کیا کہنے

تشکّر شیئر کرنے پر

 

[ظفری]

وہ ہو رہا ہے جو میں نہیں چاہتا کہ ہو
اور جو میں چاہتا ہوں وہی ہو نہیں رہا
واہ ۔ بہت خوب