ایم ڈی تاثؔیر :::::وہ مِلے تو بے تکلُّف، نہ مِلے تو بےارادہ :::::: M. D. Taseer

[طارق شاہ]

غزل
وہ مِلے تو بے تکلُّف، نہ مِلے تو بےاِرادہ
نہ طریقِ آشنائی ، نہ رُسوم ِجام و بادہ

تِری نِیم کش نِگاہیں ، تِرا زیر ِلب تبسّم
یُونہی اِک ادائےمستی، یُونہی اِک فریبِ سادہ

وہ کُچھ اِسطرح سےآئے،مُجھےاِسطرح سےدیکھا
مِری آرزو سے کم تر ، مِری تاب سے زیادہ

یہ دلِیل ِخوش دِلی ہے، مِرے واسطے نہیں ہے!
وہ دَہَن کہ ہےشگفتہ، وہ جَبِیں کہ ہے کُشادہ

وہ قدم قدم پہ لغزِش، وہ نگاہ ِمستِ ساقی
یہ تراشِ زُلفِ سرکش ، یہ کُلاہِ کج نہادہ

ایم ڈی تاثؔیر
(محمد دین تاثیر)
​

 

[محمد تابش صدیقی]

بہت خوبصورت شراکت.
خاص طور پر اس شعر کے تو کیا کہنے

وہ کُچھ اِسطرح سےآئے،مُجھےاِسطرح سےدیکھا
مِری آرزو سے کم تر ، مِری تاب سے زیادہ

 

[ابو ہاشم]

بہت خوبصورت شراکت.
خاص طور پر اس شعر کے تو کیا کہنے

وہ کُچھ اِسطرح سےآئے،مُجھےاِسطرح سےدیکھا
مِری آرزو سے کم تر ، مِری تاب سے زیادہ

کس طرح سے آئے اور کس طرح سے دیکھا؟

 

[محمد تابش صدیقی]

کس طرح سے آئے اور کس طرح سے دیکھا؟

اگلا مصرع یہی بتا رہا ہے.

 

[ابو ہاشم]

یعنی وہ میری آرزو سے کم تر آئے۔ کیامطلب؟
اور انھوں نے مجھے میری تاب سے زیادہ دیکھا۔ چہ معنی؟
تو مجموعی منظر کیا تشکیل پایا؟

 

[محمد تابش صدیقی]

یعنی وہ میری آرزو سے کم تر آئے۔ کیامطلب؟
اور انھوں نے مجھے میری تاب سے زیادہ دیکھا۔ چہ معنی؟
تو مجموعی منظر کیا تشکیل پایا؟

اتفاق سے آج ہی نظر پڑی اس غزل پر۔
اتنی تاخیر پر معذرت۔

انسان کی آرزوئیں اکثر اس کی تاب اور حیثیت سے زیادہ ہی ہوتی ہیں۔ شاعر کے کہنے کا مطلب بھی یہی ہے کہ میری آرزو سے تو کم تر توجہ دی، مگر وہ بھی میرے تاب سے زیادہ تھی۔

 

[ابو ہاشم]

شکریہ