ایک غزل - اس کے کردار کی اس کے گفتار کی

[کاشف اسرار احمد]

ایک تازہ غزل پیش کر رہا ہوں۔
تمام احباب کی رائے ، تنقید اور تبصروں کا منتظر رہونگا !
★★★★★★★★★★★★★★★★★★
اُس کے کردار کی اُس کے گفتار کی !
دل میں چبھتی رہی نوک تلوار کی !

آؤ باتیں کریں ، خوب ہنس کر ملیں
کچھ طبیعت ہو آسودہ غمخوار کی !

تلخ یادوں کے دریا سے آگے بڑھے
ہم نے رَو پار کی غم کے مُنجدھار کی !​

اب تو برسوں کی دوری پہ ہیں گھر سے ہم
کچھ خبر ہی نہیں یار اغیار کی !​

مستقل دے رہا ہے خبر دیس کی
برکتیں عمر میں ہوں اس اخبار کی !​

تنگدستی میں دل چاہتا ہے کہ ہم
گھر اٹھا لائیں ہر چیز بازار کی !​

سلسلے گمشدہ قوم سے ہیں مرے
اب سند کیا دوں میں اپنے کردار کی !​

جس رفاقت کی کاشف یہ تصویر ہے
ان سرابوں سے پسپائی اقرار کی !

سیّد کاشف
★★★★★★★★★★★★★★★★★★
​

 

[محمد تابش صدیقی]

واہ کاشف بھائی بہت خوب

سلسلے گمشدہ قوم سے ہیں مرے
اب سند کیا دوں میں اپنے کردار کی !

کس عمدگی سے کرب کو بیان کیا ہے.

 

[محمد تابش صدیقی]

عنوان میں کردار کے بعد الف زائد ہے. درست کر لیں.

 

[الف عین]

اچھی غزل ہے لیکن گفتار مؤنث ہے۔ ’اس کی گفتار‘ہونا چاہئے تھا

 

[کاشف اسرار احمد]

اچھی غزل ہے لیکن گفتار مؤنث ہے۔ ’اس کی گفتار‘ہونا چاہئے تھا

بہت بہتر استاد محترم.
لیکن اب تدوین کا لنک ختم ہو گیا ہے

 

[عباد اللہ]

واہ
بہت عمدہ غزل ہے

 

[کاشف اسرار احمد]

عنوان میں کردار کے بعد الف زائد ہے. درست کر لیں.

تابش بھائی میرے لیپ ٹاپ پر تو درست دکھا رہا ہے !

 

[کاشف اسرار احمد]

مطلع اب یوں پڑھا جائے :
اُس کی گفتار کی، اُس کے کردار کی !
دل میں چبھتی رہی نوک تلوار کی !
شکریہ۔

 

[محمد تابش صدیقی]

تابش بھائی میرے لیپ ٹاپ پر تو درست دکھا رہا ہے !

پہلے ایسا ہی تھا. اب درست ہے.