عباس تابش ایک مشکل سی بہر طور بنی ہوتی ہے - عبّاس تابش

[معاویہ وقاص]

ایک مشکل سی بہر طور بنی ہوتی ہے​

تجھ سے باز آئیں تو پھر خود سے ٹھنی ہوتی ہے​

کچھ تو لے بیٹھی ہے اپنی شکستہ پائی​

اور کچھ راہ میں چھاؤں بھی گھنی ہوتی ہے​

میرے سینے سے ذرا کان لگا کر دیکھو!​

سانس چلتی ہے کہ زنجیر زنی ہوتی ہے​

آبلہ پائی بھی ہوتی ہے مقدر اپنا​

سر پہ افلاک کی چادر بھی تنی ہوتی ہے​

دودھ کی نہر نکالی ہے غموں سے ہم نے​

ہم بتا سکتے ہیں کیا کوہ کنی ہوتی ہے​

دشت غربت ہی پہ موقوف نہیں ہے تابش​

اب تو گھر میں بھی غریب الوطنی ہوتی ہے​

عبّاس تابش​

 

[سید زبیر]

بہت خوب
کچھ تو لے بیٹھی ہے اپنی شکستہ پائی
اور کچھ راہ میں چھاؤں بھی گھنی ہوتی ہے
سبحان اللہ

 

[فاتح]

واہ کیا خوب غزل ہے حفیظ جونپوری کی زمین میں۔۔۔
میرے سینے سے ذرا کان لگا کر دیکھو!
سانس چلتی ہے کہ زنجیر زنی ہوتی ہے