طارق شاہ
محفلین
غزل
اے خوفِ مرگ ! دِل میں جو اِنساں کے تُو رَہے
پِھر کُچھ ہَوس رہے، نہ کوئی آرزُو رَہے
فِتنہ رَہے، فساد رَہے، گُفتگُو رَہے
منظُور سب مجھے، جو مِرے گھر میں تُو رَہے
زُلفیں ہٹانی چہرۂ رنگیں سے کیا ضرُور
بہتر ہے مُشک کی گُلِ عارض میں بُو رَہے
اب تک تِرے سبب سے رَہے ہم بَلا نصیب
اب تابہ حشر گور کے پہلُو میں تُو رَہے
یہ اشکِ اِنفعال نہ خالی اثر سے ہَوں
یارب! ہمارے موتِیوں کی آبرُو رَہے
بُلبُل رہا ہے طائرِ دِل اِس میں عُمر بھر !
سرسبز حشر تک چَمَنِ آرزُو رَہے
اے چشم ! عین بزم میں رونا نہیں ہے خُوب
وہ بات کر ،کہ جس میں تِری آبرُو رَہے
پِیرِمُغاں کا سِلسِلہ دیکھے جو مُحتَسب !
اُمّیدوارِ بَیعَتِ دستِ سبُو رَہے
ہر دَم یہ اِنتظار کا اِیما ہے ہجر میں
آنکھوں میں، جائے اشک جِگر کا لہوُ رَہے
احباب کیا کریں گے ٹھہر کر مزار پر
بالیں پہ خاک اُڑانے کو ہاں آرزُو رَہے
خاطر تو تم نے آج بہت کی ،مگر حضُور !
کل پِھر یہی نِگاہ ، یہی گُفتگُو رَہے
اکؔبر الٰہ آبادی