حسرت موہانی بس کہ نکلی نہ کوئی جی کی ہوس ۔ حسرت موہانی

[فرخ منظور]

بس کہ نکلی نہ کوئی جی کی ہوس
اب ہوں میں اور بے دلی کی ہوس

کہ رہے دل نہ بے قراریِ دل
عاشقی ہو نہ عاشقی کی ہوس

وہ ستمگر بھی ہے عجیب کوئی
کیوں ہوئی دل کو پھر اسی کی ہوس

پھرتی رہتی ہے آدمی کو لئے
خوار دنیا میں آدمی کی ہوس

دونوں یکساں ہیں بے خودی میں ہمیں
فکرِ غم ہے نہ خمریِ کی ہوس

واقفِ لذّتِ جنوں جو ہوا
نہ رہی اس کو آگہی کی ہوس

ان کو دیکھا ہے جب سے گرمِ عتاب
آرزو کو ہے خود کشی کی ہوس

کر سکیں بھی تو ہم فقیر ترے
نہ کریں تاجِ خسرویِ کی ہوس

ہجرِ ساقی کے دور میں حسرت
اب نہ مے ہے نہ مے کشی کی ہوس

(مولانا حسرت موہانی)

 

[الف نظامی]

شکریہ سخنور۔ اس شعر کا دوسرا مصرع سمجھ نہیں آیا۔ خمری کیا چیز ہے؟
دونوں یکساں ہیں بے خودی میں ہمیں
فکرِ غم ہے نہ خمریِ کی ہوس

 

[فرخ منظور]

شکریہ سخنور۔ اس شعر کا دوسرا مصرع سمجھ نہیں آیا۔ خمری کیا چیز ہے؟
دونوں یکساں ہیں بے خودی میں ہمیں
فکرِ غم ہے نہ خمریِ کی ہوس

خمری ۔ خرما کی ایک قسم جس سے عمدہ شراب تیار ہوتی ہے۔

 

[کاشفی]

بہت خوب جناب سخنور صاحب!