تازہ آمد است

[محمد خرم یاسین]

تیرا خیال آتے ہی نا جانے کیسے​

صوفی بن جاتا ہوں​

ہاتھ میں ریشمی کپڑے کا ٹکڑا تھامے ​

دوسری جانب چوڑیوں سے مخمور حنائی ہاتھ کو دیکھتا ہوں​

آنکھ بتقاضائے حیا اٹھ نہیں پاتی​

اورمذہبِ عشق میں بیعت ہوجاتا ہوں ​

پنجابی دھن پر ترکی صوفیوں کے ساتھ لمبا چولا پہنے ​

کتنے ہی بھگتوں، جوگیوں، صوفیوں کے سنگ گھومتا ہوں​

خود سے، خودی سے۔۔۔ بہت دور​

ایک خمار، ایک وجد کی سی حالت میں جھومتاہوں​

جسم روح۔۔۔ اور زمیں بادل بن جاتی ہے​

گھومتا، جھومتا، تھک کر ، گر کر ​

ہوش سے بیگانہ ہوجاتا ہوں ​

اور جب عشق کے تھیا تھیا سے باہر نکلوں​

توپھر سے زندگی اوڑھے​

زندگی کی راہ پرچل پڑتا ہوں​

مذہبِ عشق سے ۔۔۔لڑ پڑتاہوں!​

 

[فاتح]

اچھا مختصر مضمون لکھا ہے۔ خوب ہے۔
شاید غلطی سے بار بار انٹر کا بٹن دبتا گیا ہے اور خواہ مخواہ کی لائن بریکس کے باعث مضمون پڑھنے میں دشواری ہو رہی ہے۔
درستی کر دیتا ہوں:
تیرا خیال آتے ہی نا جانے کیسے صوفی بن جاتا ہوں۔ ہاتھ میں ریشمی کپڑے کا ٹکڑا تھامے دوسری جانب چوڑیوں سے مخمور حنائی ہاتھ کو دیکھتا ہوں، آنکھ بتقاضائے حیا اٹھ نہیں پاتی اورمذہبِ عشق میں بیعت ہوجاتا ہوں ۔ پنجابی دھن پر ترکی صوفیوں کے ساتھ لمبا چولا پہنے کتنے ہی بھگتوں، جوگیوں، صوفیوں کے سنگ گھومتا ہوں۔ خود سے، خودی سے۔۔۔ بہت دور ایک خمار، ایک وجد کی سی حالت میں جھومتا ہوں۔ جسم روح اور زمیں بادل بن جاتی ہے۔ گھومتا، جھومتا، تھک کر ، گر کر ہوش سے بیگانہ ہوجاتا ہوں اور جب عشق کے تھیا تھیا سے باہر نکلوں تو پھر سے زندگی اوڑھے زندگی کی راہ پرچل پڑتا ہوں مذہبِ عشق سے لڑ پڑتاہوں!

 

[یاز]

بہت عمدہ جناب۔ مختصر مگر اچھا مضمون ہے۔
اور شکریہ فاتح بھائی، مشکل کو آسان کرنے کے لئے۔

 

[زیک]

شاید غلطی سے بار بار انٹر کا بٹن دبتا گیا ہے اور خواہ مخواہ کی لائن بریکس کے باعث مضمون پڑھنے میں دشواری ہو رہی ہے۔
درستی کر دیتا ہوں:

اینٹر یا ڈیش ہر چند الفاظ کے بعد لگانے کی بھی اپنی خوبصورتی ہوتی ہے۔

 

[فاتح]

اینٹر یا ڈیش ہر چند الفاظ کے بعد لگانے کی بھی اپنی خوبصورتی ہوتی ہے۔

جی بہتر۔ تب تو میں آپ کی اس نظم کی بھی اصلاح کر کے اسے خوبصورت بنا دیتا ہوں
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
اینٹر یا
ڈیش
ہر چند ۔۔۔۔۔
الفاظ کے بعد ،۔۔۔۔۔۔
لگانے کی
بھی
اپنی ۔۔۔۔۔ خوبصورتی
ہوتی ہے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

 

[زیک]

جی بہتر۔ تب تو میں آپ کی اس نظم کی بھی اصلاح کر کے اسے خوبصورت بنا دیتا ہوں
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
اینٹر یا
ڈیش
ہر چند ۔۔۔۔۔
الفاظ کے بعد ،۔۔۔۔۔۔
لگانے کی
بھی
اپنی ۔۔۔۔۔ خوبصورتی
ہوتی ہے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

ویسے تو میری پوسٹ کو آپ نے چار چاند لگا دیئے ہیں لیکن کچھ ڈیش کی کمی پھر بھی محسوس ہو رہی ہے۔

 

[فاتح]

ویسے تو میری پوسٹ کو آپ نے چار چاند لگا دیئے ہیں لیکن کچھ ڈیش کی کمی پھر بھی محسوس ہو رہی ہے۔

حضور یہ آپ کی ذرہ نوازی ہے کہ خاکسار کی اصلاح کو قبول فرمایا ۔۔۔ ڈیش کی کمی کے حوالے سے متفق ہوں کہ میں سمجھتا ہوں کہ بہتری کی گنجائش تو ہر حال میں موجود رہتی ہے

 

[محمد تابش صدیقی]

اچھے خیالات ہیں خرم بھائی.

ازراہِ تفنن انور مسعودصاحب کا ایک قطعہ پیش کر رہا ہوں. امید ہے برا نہیں مانیں گے.

کربِ کبیرہ
اُسے سوجھے گی نارنگی نہ گاڑی
اِسی تکلیف میں کھویا رہے گا
سُنا دو کوئی نثری نظم اُس کو
کبیرا حشر تک روتا رہے گا​

 

[محمد خرم یاسین]

اچھے خیالات ہیں خرم بھائی.

ازراہِ تفنن انور مسعودصاحب کا ایک قطعہ پیش کر رہا ہوں. امید ہے برا نہیں مانیں گے.

کربِ کبیرہ
اُسے سوجھے گی نارنگی نہ گاڑی
اِسی تکلیف میں کھویا رہے گا
سُنا دو کوئی نثری نظم اُس کو
کبیرا حشر تک روتا رہے گا​

یہ تو قبلہ نے نثری نظم کی پرسوزی کی تائید کر دی۔۔۔ آپ کی وساطت سے انور مسعود کا شکریہ۔ عروضیے کتناہی شور مچا لیں نثری نظم قائم رہے گی، بڑھے گی، پھلے پھولے گی اور جدید اصنافِ نظم میں اپنی جگہ برقرار رکھے گی۔

 

[محمد خرم یاسین]

بہت عمدہ جناب۔ مختصر مگر اچھا مضمون ہے۔
اور شکریہ فاتح بھائی، مشکل کو آسان کرنے کے لئے۔

شکریہ نوازش یاز بھائی۔ مضمون تو کسی بھی چیز میں باندھا جا سکتا ہے خواہ مثنوی ہو یا نظم ہو۔ مثنوی میں داستانوں پر تو پی ایچ ڈی کی ڈگری دی جا چکی ہے۔ کہہ مکرنی، ریختی وغیرہ کا حال بھی اس سے مختلف نہیں۔

 

[عباد اللہ]

اچھے خیالات ہیں خرم بھائی.

ازراہِ تفنن انور مسعودصاحب کا ایک قطعہ پیش کر رہا ہوں. امید ہے برا نہیں مانیں گے.

کربِ کبیرہ
اُسے سوجھے گی نارنگی نہ گاڑی
اِسی تکلیف میں کھویا رہے گا
سُنا دو کوئی نثری نظم اُس کو
کبیرا حشر تک روتا رہے گا​

اسی ذیل میں انور مسعود ہی کا ایک اور شعر اس مان کے ساتھ کہ آپ برا نہیں مانیں گے

کس ناز سے وہ نظم کو کہہ دیتے ہیں نثری ​

جب اس کے خطا ہوتے ہیں اوزان وغیرہ !!​

 

[محمد تابش صدیقی]

اسی ذیل میں انور مسعود ہی کا ایک اور شعر اس مان کے ساتھ کہ آپ برا نہیں مائیں گے

کس ناز سے وہ نظم کو کہہ دیتے ہیں نثری ​

جب اس کے خطا ہوتے ہیں اوزان وغیرہ !!​

میں برا کیسے مان سکتا ہوں جب انور مسعود کی بات سے مکمل اتفاق ہو تو۔

 

[عباد اللہ]

میں برا کیسے مان سکتا ہوں جب انور مسعود کی بات سے مکمل اتفاق ہو تو۔

ارے بھیا یہ بات تو صاحبِ مراسلہ سے کہی تھی ۔۔۔۔

 

[محمد خرم یاسین]

ارے بھیا یہ بات تو صاحبِ مراسلہ سے کہی تھی ۔۔۔۔

کوئی بات نہیں بھائی۔ دل اور دماغ کشادہ ہے۔ آپ اپنی مشق جاری رکھیے، ہم اپنی جاری رکھتے ہیں۔ جو کام خود نہ کر سکیں اس میں عیب جوئی کرکے احساسِ کمتری کا بدلہ لینا کچھ نیا تو نہیں ہے ناں ؟

 

[محمد خرم یاسین]

جی بہتر۔ تب تو میں آپ کی اس نظم کی بھی اصلاح کر کے اسے خوبصورت بنا دیتا ہوں
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
اینٹر یا
ڈیش
ہر چند ۔۔۔۔۔
الفاظ کے بعد ،۔۔۔۔۔۔
لگانے کی
بھی
اپنی ۔۔۔۔۔ خوبصورتی
ہوتی ہے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

فاتح، آپ آہستہ آہستہ انٹر کا استعمال سیکھ رہے ہیں،

 

[عباد اللہ]

کوئی بات نہیں بھائی۔ دل اور دماغ کشادہ ہے۔ آپ اپنی مشق جاری رکھیے، ہم اپنی جاری رکھتے ہیں۔ جو کام خود نہ کر سکیں اس میں عیب جوئی کرکے احساسِ کمتری کا بدلہ لینا کچھ نیا تو نہیں ہے ناں ؟

تازہ بہ تازہ تو بہ نو!!!
وہ اعلی مرتبت
کہ صعوبتوں اور مصائب کو
زادِ سفر جانتے ہیں کبھی بے مرام نہیں لوٹتے
گوہرِ مراد
انہی کے ہاتھ اتا ہے
وہ جو کشٹ کھیچتے ہیں
اور بے پایاں شناوری سے نہیں گھبراتے
منازل کے لئے
ان راہروؤں کی قدم بوسی
باعثِ افتخار ہے
۔۔۔
(وہ اعلی مرتبت کہ صعوبتوں اور مصائب کو زادِ سفر جانتے ہیں ،کبھی بے مرام نہیں لوٹتے۔ گوہرِ مراد انہی کے ہاتھ آتا ہے۔وہ جو کشٹ کھیچتے ہیں اور بے پایاں شناوری سے نہیں گھبراتے ،منازل کے لئے ان راہروؤں کی قدم بوسی باعثِ افتخار ہے۔)
یا
آلام و مصائب کو جو رختِ سفر سمجھے
اے وائے تن آسانی ناپید ہے وہ راہی
دو باتیں ہیں
ا۔ اگر اس قسم کے اشعار کی نثر بنا کر نظم کہنے پر اصرار کیا جائے گا تو ۔۔۔۔۔
ب۔ پسند اپنی اپنی
اگر آپ انور مسعود سے اس قسم کی حرکت کی توقع رکھتے ہیں تو عبث ہے۔۔