ولی دکنی تجھ لب کی صِفَت لعلِ بدخشاں سوں کہوں گا ۔ ولی دکنی

[ارشد خان]

۔۔۔۔۔۔۔۔۔۔۔۔۔ شعر


تجھ لب کی صفت لال بد خشا ں سوں کہوں گا
جا دو ہیں تیرے نین ، غزالاں سوں کہوں گا

۔۔۔۔۔۔۔۔۔۔ ولی د کنی

 

[محمد وارث]

بہت خوب،

یک نقطہ ترے صفحۂ رخ پر نہیں بے جا
اس مُکھ کو ترے صفحۂ قرآں سوں کہوں گا

 

[فرخ منظور]

بہت خوب،

یک نقطہ ترے صفحۂ رخ پر نہیں بے جا
اس مُکھ کو ترے صفحۂ قرآں سوں کہوں گا

حضور پوری غزل ہی پوسٹ کردیں ۔ ایک ایک شعر لکھ کر کیوں ترساتے ہیں۔

 

[محمد وارث]

بھئی یہ تو خان صاحب ہی بہتر فرمائیں گے کہ کیا انہیں اس غزل کا ایک شعر ہی پسند تھا

 

[فرخ منظور]

بھئی یہ تو خان صاحب ہی بہتر فرمائیں گے کہ کیا انہیں اس غزل کا ایک شعر ہی پسند تھا

حضور ہمیں تو پسند ہے ۔ لگیں ہاتھوں یہ غزل پوسٹ کر ہی ڈالیں۔

 

[ارشد خان]

جناب ۔ میرے پاس یہ مکمل غزل دستیاب نہیں ۔ کافی عرصہ پہلے ایک کتاب پڑھی تھی
اس میں ولی د کنی کے بہت سے اشعار تھے ۔ ایک شعر ہی یاد رہ گیا ہے
ولی دکنی کا دیوان تلاش کر رہا ہوں ۔ کیا کسی سائٹ پر دستیاب ہے ا ن کی شاعری ؟

 

[محمد وارث]

ارشد خان صاحب، ولی دکنی کے دیوان کا انتخاب مکتبہ میری لائبریری لاہور، نے 1987ء میں شائع کیا تھا، یہ انتخاب محمد اشرف خان کا ہے، ایک بات یہ کہ اسی انتخاب میں انہوں نے مولانا حسرت موہانی کا انتخاب کردہ ولی کا کلام بھی شامل کر دیا ہے۔

مذکورہ غزل اسی انتخاب میں سے (آپ نے جو پہلا شعر لکھا ہے وہ بھی نادرست ہے):

تجھ لب کی صِفَت لعلِ بدخشاں سوں کہوں گا
جادو ہیں تیرے نین، غزالاں سوں کہوں گا

دی بادشَہی حق نے، تجھے حسن نگر کی
یو کشورِ ایراں، میں سلیماں سوں کہوں گا

تعریف ترے قد کی الف دار، سری جن
جا سرو گلستاں کوں خوش الحاں سوں کہوں گا

مجھ پر نہ کرو ظلم، تم اے لیلٰیِ خوباں
مجنوں ہوں، ترے غم کوں بیاباں سوں کہوں گا

دیکھا ہوں تجھے خواب میں اے مایۂ خوبی
اس خواب کو جا یوسفِ کنعاں سوں کہوں گا

جلتا ہوں شب و روز ترے غم میں اے ساجن
یہ سوز ترا مشعلِ سوزاں سوں کہوں گا

یک نقطہ ترے صفحۂ رخ پر نہیں بے جا
اس مُکھ کو ترے صفحۂ قرآں سوں کہوں گا

متروک الفاظ کے معانی:

سوں - سے
کوں - کو، کر
یو - یہ
سری جن - محبوب

 

[ارشد خان]

شکریہ معلومات مہیا کرنے کے لئے ۔

اور مکمل غزل کا ۔

 

[فرخ منظور]

واہ واہ! مکمل غزل پوسٹ کرنے کا بہت شکریہ وارث صاحب !

 

[محمد وارث]

مولانا آزاد کی "آبِ حیات" میں سے اس خوبصورت غزل کے دو مزید اشعار:

زخمی کیا ہے مجھ تری پلکوں کی انی نے
یہ زخم ترا خنجر و بھالاں سوں کہوں گا

بے صبر نہ ہو اے ولی اس درد سے ہرگاہ
جلدی سوں ترے درد کی درماں سوں کہوں گا

 

[نوید صادق]

اے نورِ جان و دیدہ، ترے انتظار میں
مدت ہوئی، پلک سوں پلک آشنا نہیں

ولی دکنی

 

[فرخ منظور]

وارث صاحب اور احباب، اس غزل کو کلیاتِ ولی سے دیکھ کر دوبارہ پوسٹ کر رہا ہوں۔ وارث صاحب کی پوسٹ کردہ غزل کے مقابلے میں اس غزل میں کچھ اشعار اضافی ہیں اور کچھ اشعار میں تبدیلی بھی ہے۔


تجھ لب کی صِفَت لعلِ بدخشاں سوں کہوں گا
جادو ہے تری نین، غزالاں سوں کہوں گا

دی حق نے تجھے بادشَہی حسنِ نگر کی
جا کشورِ ایراں، میں سلیماں سوں کہوں گا

تعریف ترے قد کی الف وار، سری جن
جا سرو گلستاں میں خوش الحاں سوں کہوں گا

زخمی کیا ہے دل تری پلکاں کی انی نے
یو زخم ترا خنجر و پیکاں سوں کہوں گا

مجھ پر نہ کرو ظلم، تم اے لیلٰیِ خوباں
مجنوں ہوں، ترا غم میں بیاباں سوں کہوں گا

دیکھا میں تجھے خواب میں اے مایۂ خوبی
اس خواب کو جا یوسفِ کنعاں سوں کہوں گا

جلتا ہوں شب و روز ترے غم میں اے ساجن
یہ سوز ترا مشعلِ سوزاں سوں کہوں گا*

یک نقطہ ترے صفحۂ رخ پر نہیں بے جا
اس مُکھ کو ترے صفحۂ قرآں سوں کہوں گا

قربان پری مکھ پہ ہوئی چوب سی جل کر
یہ بات عجائب، مہِ تاباں سوں کہوں گا

بے صبر نہ ہو اے ولی اس درد سوں ہرگز
چلتا ہوں ترا درد میں درماں سوں کہوں گا

(ولی دکنی)

* فرانس کے چھپے ہوے دیوان میں یہ شعر اس طرح ہے
جلتا ہوں ترے غم کی اگن موں جو شب و روز
اُس سوزشِ آتش کوں جا سوزاں سوں کہوں گا