تم گلستاں سے گئے ہو تو گلستاں چپ ہے ۔ مخدوم محی الدین

[فرخ منظور]

تم گلستاں سے گئے ہو، تو گلستاں چپ ہے
شاخِ گل کھوئی ہوئی، مرغِ خوش الحاں چپ ہے

افقِ دل پہ دکھائی نہیں دیتی ہے دھنک
غمزدہ موسمِ گل، ابرِ بہاراں چپ ہے

عالمِ تشنگیِ بادہ گساراں مت پوچھ
میکدہ دور ہے، مینائے زر افشاں چپ ہے

اور آگے نہ بڑھا قصۂ دل قصۂ غم
دھڑکنیں چپ ہیں، سرشکِ سرِ مژگاں چپ ہے


شہر میں ایک قیامت تھی، قیامت نہ رہی
حشر خاموش ہے، فتنہُ دوراں چپ ہے

نہ کسی آہ کی آواز، نہ زنجیر کا شور
آج کیا ہوگیا زنداں میں کہ زنداں چپ ہے

مخدوم محی الدین

​