قمر جلالوی توبہ کیجے اب فریبِ دوستی کھائیں گے کیا- قمر جلالوی

[فرحان محمد خان]

توبہ کیجے اب فریبِ دوستی کھائیں گے کیا
آج تک پچھتا رہے ہیں اور پچھتائیں گے کیا

خود سمجھیے ذبح ہونے والے سمجھائیں گے کیا
بات پہنچے گی کہاں تک آپ کہلائیں گے کیا

بزمِ کثرت میں یہ کیوں ہوتا ہے ان کا انتظار
پردۂِ وحدت سے وہ باہر نکل آئیں گے کیا

کل بہار آئے گی یہ سن کر قفس بدلو نہ تم
رات بھر میں قیدیوں کے پر نکل آئیں گے کیا

اے دلِ مضطر انہیں باتوں سے چھوٹا تھا چمن
اب ترے نالے قفس سے بھی نکلوائیں گے کیا

اے قفس والو رہائی کی تمنا ہے فضول
فصلِ گل آنے سے پہلے پر نہ کٹ جائیں گے کیا

شام غم جل جل کے مثلِ شمع ہو جاؤں گا ختم
صبح کو احباب آئیں گے تو دفنائیں گے کیا

جانتا ہوں پھونک دے گا میرے گھر کو باغباں
آشیاں کے پاس والے پھول رہ جائیں گے کیا

ان کی محفل میں چلا آیا ہے دشمن خیر ہو
مثلِ آدم ہم بھی جنت سے نکل جائیں گے کیا

ناخدا موجوں میں کشتی ہے تو ہو ہم کو نہ دیکھ
جن کو طوفانوں نے پالا ہے وہ گھبرائیں گے کیا

تو نے طوفاں دیکھتے ہی کیوں نگاہیں پھیر لیں
ناخدا یہ اہلِ کشتی ڈوب ہی جائیں گے کیا

کیوں یہ بیرونِ چمن جلتے ہوئے تنکے گئے
میرے گھر کی آگ دنیا بھر میں پھیلائیں گے کیا

کوئی تو مونس رہے گا اے قمرؔ شامِ فراق
شمع گل ہوگی تو یہ تارے بھی چھپ جائیں گے کیا ​

قمرؔ جلالوی​

 

[فرحان محمد خان]

استاد قمر جی کی اپنی آواز میں