تو عشق ھے صحرائے محبت ہے ترا دیس

[فاروق درویش]

کس پردہ ء افلاک میں جانے ھے وہ پنہاں
اک نغمہ ء بے تاب جو ھونٹوں کا ھے ارماں

جمہور کا دستور ھے بس مرگ ِ مساوات
افلاس کی آندھی میں کہاں جشن ِ چراغاں

پوشاک ِ قلندر میں ھیں احرار کہ میخوار
ایوان ِ مسلماں ھیں کہ مندر کے نگہباں

جائے گا کہاں بھاگ کے اس قید ِ قفس سے
صحرا کے مسافر ترا خیمہ بھی ہے زنداں

دیتے ھیں خبر حشر کی صحراؤں کے عقرب
اب شہر ِ خموشاں ھے ترا کوچہ ء جاناں

والعصر سے والناس کی تفسیر عیاں دیکھ
ہنستی ھے ترے حال پہ اب ظلمت ِ دوراں

چڑھتا ھوا سورج ہے سلگتا ھوا آشوب
دریائے فغاں پر ھے بپا شام ِ غریباں

تو عشق ھے صحرائے محبت ہے ترا دیس
اٹھتا ھے دھواں قیس ھوئے چاک گریباں

آتش ھے جو ھر عشق زدہ قلب و جگر میں
روشن اسی شعلے سے ھے درویش کا عرفاں

فاروق درویش

 

[محمد وارث]

بہت خوب فاروق صاحب۔

جائے گا کہاں بھاگ کے اس قید ِ قفس سے
صحرا کے مسافر ترا خیمہ بھی ہے زنداں

واہ واہ واہ، لاجواب

 

[الف عین]

اچھی غزل ہے درویش۔ لیکن املا کی ایک بات کہوں۔۔ غیر ضروری ’ھ‘ لکھنے سے بچئے۔ میں اپنی برقی کتابوں میں اس کی تصحیح کرتے کرتے تنگ آ چکا ہوں۔ آپ کا کلام بھی اگر مل سکے تو اس کی بھی برقی کتاب بنا دوں۔ ای میل تو شاید آپ کو معلوم ہو گا، فیس بک سے۔

 

[فاروق درویش]

برادرم محمد وارث صاحب ممنون ھوں آپ کی محبتوں اور حوصلہ افزائی کا ۔۔۔۔۔۔۔۔۔۔۔۔۔۔ خوش آباد

 

[فاروق درویش]

محترم و مکرم الف عین صاحب آُپ کی محبت اور توجہ کیلئے ممنون ھوں، آپ جیسے بزرگ اور اھل علم کی شفقت اور موجودگی اس فورم کے دوستوں کیلئے ایک قیمتی سرمایہ ھے کہ آپ کے عالمانہ مشورے میرے لئے احکام کا درجہ رکھتے ھیں ۔ سدا خوش آباد و خوش مراد رہیں ۔۔۔۔ والسلام