تک بندیاں

[عرفان سعید]

(چلتے پھرتے چند تک بندیاں کہہ ڈالیں، پیش کرنے کی جسارت کر رہا ہوں)

سن کر فغاں میری اسرافیل حیرت سے چُور
پھونکا یہ کن نغموں نے روزِ قیامت کا صُور؟
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
اے ماہتاب! تیرے سینے پر لگا ہے یہ جو داغ
تو نے بھی کیا جلا رکھا ہے سوزِ عشق کا چراغ؟
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
نہ ذوقِ نوری ہے مجھ کو نہ ہے اندیشۂ ناری
ابابیلوں کا سوچوں کے حرم پر پہرہ ہے جاری
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
خدا کی رحمت کا بھی دیکھو ایک اعجاز ہوں میں
گناہوں کے بوجھ تلے بھی محوِ پرواز ہوں میں
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
تمنائے فردوس! یہ منزل عشق کی اوج ہے کیا ؟
یا ساحلِ بے خودی پہ نقشِ کفِ موج ہے کیا؟
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
آلودہ کردے جو طریقِ حکمراں کو آمری
روحِ کلیمی ہوتی ہے محکومِ سحرِ سامری
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
اشک چشمِ بھنور سے اس موج کے غم میں رواں
بحر سے ابھری، رہی پھر بھی ساحل سے نہاں
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
وہ لہر ہی آخر کیا جو امید کا ساحل چھوڑے؟
چشمِ فراست سے دیکھ وہ موج جو پتھر پھوڑے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
وہ کیمیاگرتو محوِ افشائے سرِ ترکیبِ روشنائی
یہ تجربہ گاہ تو سکھاتی نہیں نگارش سے آشنائی
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
(عرفان)​