طارق شاہ
محفلین
سِراؔج اورنگ آبادی
جاناں پہ جی نثار ہُوا، کیا بَجا ہُوا
اُس راہ میں غُبار ہُوا کیا بَجا ہُوا
مُدّت سے رازِ عِشق مِرے پر عیاں نہ تھا
یہ بَھید آشکار ہُوا، کیا بَجا ہُوا
تازے کِھلے ہیں داغ کے گُل، دِل کے باغ میں !
پِھر موسمِ بہار ہُوا، کیا بَجا ہُوا
دِل تجھ پری کی آگ میں سِیماب کی مثال
آخر کو بیقرار ہُوا، کیا بَجا ہُوا
کِشوَر میں دِل کے تھا عَمَلِ صُوبہ دار عیش
اب غم کا اِختیار ہُوا، کیا بَجا ہُوا
آہوئے دِل، کہ وحشیِ صحرائے عقل تھا !
تجھ زُلف کا شِکار ہُوا، کیا بَجا ہُوا
وہ آفتاب، آج مِرے قتل پر سِراؔج !
شب دیز پر سوار ہُوا، کیا بَجا ہُوا
سِراؔج اورنگ آبادی