جا چھوڑ دیا حافظِ قرآن سمجھ کر ۔ دو غزلہ از شاہ نصیر

[فاتح]

غزل 1​

رکھ پاؤں سرِ گورِ غریبان سمجھ کر​

چلتا ہے زمیں پر ہر اک انسان سمجھ کر​

​

ہشیار دِلا رہیو کہ دکھلا کے وہ زلفیں​

لیتا ہے تجھے پہنچے میں نادان سمجھ کر​

​

سرکا ہے دوپٹا رخِ مہ وَش پہ سحر کو​

گردوں پہ نکل مبرِ درخشان سمجھ کر​

​

لایا ہوں تری نذر کو لختِ جگر و اشک​

رکھ دستِ مژہ پر دُرِ مرجان سمجھ کر​

​

ہے مارِ سیہ حسن کی دولت پہ تری زلف​

کیا خوب یہ چڑھوائی نگہبان سمجھ کر​

​

یہ طفلِ سرشک ایک ہی ابتر ہے بہَر وجہ​

آنکھوں میں رکھوں کیوں کہ نہ طوفان سمجھ کر​

​

روکش دہَنِ یار سے، کس منہ سے ہو غنچہ​

رہتا ہے سدا سر بگریبان سمجھ کر​

​

افسوس کہ لگتا نہیں سینے سے وہ گل رُو​

اس دل کو مرے آتشِ سوزان سمجھ کر​

​

جز شانہ نہ الجھا یہ ہمارا دلِ صد چاک​

اس زلف کو شیرازۂ قرآن سمجھ کر​

​

اے خالِ رخِ یار تجھے ٹھیک بناتا​

جا چھوڑ دیا حافظِ قرآن سمجھ کر​

​

کیا لعل جَڑے ہیں لبِ نوشیں میں تمھارے​

قیمت کہو بوسے کی مری جان سمجھ کر​

​

ایسا یہ نہیں دل کہ جسے مفت تمھیں دوں​

کہتا بھی ہے جو بات تو انسان سمجھ کر​

​

اس بحر میں اک اور نصیرؔ اب تو غزل پڑھ​

کہتا ہوں یہ میں تجھ کو سخن دان سمجھ کر​

​

غزل 2​

عاشق ہوئے جس بت کو تھے نادان سمجھ کر​

بوسہ نہیں دیتا وہ مسلمان سمجھ کر​

​

مجھ کو نہ دکھا دستِ حنائی تو مری جان​

مر جاؤں گا میں پنجۂ مرجان سمجھ کر​

​

اتنا بھی نہ ہو در پئے جاں اے غمِ ہجراں​

کہتے نہیں کچھ ہم تجھے مہمان سمجھ کر​

​

لوں کیوں کہ نہ بوسہ لبِ جاں بخش ترے کا​

آیا ہوں اسے چشمۂ حیوان سمجھ کر​

​

دل تو تجھے بھولے سے دیا کافرِ بد کیش​

پر یاد رہے، دوں گا میں ایمان سمجھ کر​

​

میرے دلِ سی پارہ کی کیا قدر تو جانے​

رکھتا ہوں بغل میں اسے قرآن سمجھ کر​

​

جس جا پہ ترے کشتۂ قامت کا ہے مدفن​

واں رکھیو قدم سروِ چراغان سمجھ کر​

​

لے کون تمھارے لبِ پاں خوردہ کا بوسہ​

ڈرتا ہے ہر اک اخگرِ سوزان سمجھ کر​

ق​

گل کھائے تھے ہم نے تری الفت میں سراپا​

کچھ اور ہی اے شمعِ شبستان سمجھ کر​

​

پر تو نے تماشا دلِ پُر داغ کا میرے​

دیکھا نہ کبھو سروِ چراغان سمجھ کر​

​

دیکھا جو نصیرؔ اس کے خط و زلف کو ہم نے​

آشفتہ ہوئے سنبل و ریحان سمجھ کر​

شاہ محمد نصیر الدین دہلوی​

 

[سید زبیر]

بہت خوبصورت انتخاب

 

[فاتح]

بہت خوبصورت انتخاب

بہت شکریہ بزرگوار

 

[الف عین]

بہت خوب۔ مشکل یہ ہے کہ پیر شاہ نصیر گولڑوی کو بھی لوگ شاہ نصیر لکھ دیتے ہیں، اور یہ پتہ نہیں چلتا کہ کون سا کلام کلاسیکی نصیر کا ہے، اور کون سا مرحوم پیر صاحب کا۔

 

[فاتح]

بہت خوب۔ مشکل یہ ہے کہ پیر شاہ نصیر گولڑوی کو بھی لوگ شاہ نصیر لکھ دیتے ہیں، اور یہ پتہ نہیں چلتا کہ کون سا کلام کلاسیکی نصیر کا ہے، اور کون سا مرحوم پیر صاحب کا۔

شکریہ
شاید ایسا بھی کرتے ہوں گے لوگ لیکن وہی کرتے ہوں گے جنھیں کلاسیکی ادب اور قدما اساتذہ کا علم نہیں ہو گا۔

 

[محمد وارث]

بہت خوب۔ مشکل یہ ہے کہ پیر شاہ نصیر گولڑوی کو بھی لوگ شاہ نصیر لکھ دیتے ہیں، اور یہ پتہ نہیں چلتا کہ کون سا کلام کلاسیکی نصیر کا ہے، اور کون سا مرحوم پیر صاحب کا۔

اعجاز صاحب، پیر سید نصیر الدین گولڑوی کو عموماً نصیر الدین نصیر لکھا جاتا ہے۔

 

[محمد وارث]

لاجواب، شکریہ فاتح صاحب ارسال فرمانے کیلیے۔

 

[فاتح]

لاجواب، شکریہ فاتح صاحب ارسال فرمانے کیلیے۔

پسند فرمانے پر آپ کا بھی شکریہ وارث صاحب

 

[شیزان]

واہ واہ
کیا بات ہے۔۔سونے پہ سہاگہ
بےحد شکریہ فاتح بھائی اس نایاب تحفے کے لیے

 

[فاتح]

واہ واہ
کیا بات ہے۔۔سونے پہ سہاگہ
بےحد شکریہ فاتح بھائی اس نایاب تحفے کے لیے

پسند فرمانے پر آپ کا بہت شکریہ شیزان صاحب

 

[نیرنگ خیال]

بہت عمدہ کلام فاتح بھائی۔ اچھا ایک بات پوچھوں۔
یہ جو بیچ میں "ق" لکھا جاتا ہے۔ اس کا کیا مطلب ہوتا ہے؟

 

[عائشہ عزیز]

بہت عمدہ کلام فاتح بھائی۔ اچھا ایک بات پوچھوں۔
یہ جو بیچ میں "ق" لکھا جاتا ہے۔ اس کا کیا مطلب ہوتا ہے؟

میں بتاؤں بھیا
"ق" سے تھوڑا "قیام"کیجئے اور پھر آگے پڑھیے۔

 

[نیرنگ خیال]

میں بتاؤں بھیا
"ق" سے تھوڑا "قیام"کیجئے اور پھر آگے پڑھیے۔

واقعی دو غزلہ سہ غزلہ میں اس کی ضرورت تو پڑتی رہتی ہے۔۔۔

 

[عائشہ عزیز]

واقعی دو غزلہ سہ غزلہ میں اس کی ضرورت تو پڑتی رہتی ہے۔۔۔

وہی ناں

 

[فاتح]

بہت عمدہ کلام فاتح بھائی۔ اچھا ایک بات پوچھوں۔
یہ جو بیچ میں "ق" لکھا جاتا ہے۔ اس کا کیا مطلب ہوتا ہے؟

ق سے مراد ہے قطعہ۔۔۔ یعنی اس ق کے بعد کے دو اشعار قطعہ بند اشعار ہیں اور دونوں اشعار مل کر مضمون بیان کر رہے ہیں۔۔۔ ق لکھ کر یہ وضاحت کرنے کی ضرورت اس لیے پیش آتی ہے کہ غزل کا ہر شعر اپنی ذات میں الگ مضمون بیان کر رہا ہوتا ہے ۔

 

[فاتح]

میں بتاؤں بھیا
"ق" سے تھوڑا "قیام"کیجئے اور پھر آگے پڑھیے۔

عائشہ بیٹا، تجوید کے قواعد کے اعتبار سے تو تمہاری بات بالکل ٹھیک ہے لیکن شاعری میں اس ق کا مطلب مختلف ہے

 

[نیرنگ خیال]

ق سے مراد ہے قطعہ۔۔۔ یعنی اس ق کے بعد کے دو اشعار قطعہ بند اشعار ہیں اور دونوں اشعار مل کر مضمون بیان کر رہے ہیں۔۔۔ ق لکھ کر یہ وضاحت کرنے کی ضرورت اس لیے پیش آتی ہے کہ غزل کا ہر شعر اپنی ذات میں الگ مضمون بیان کر رہا ہوتا ہے ۔

شکریہ فاتح بھائی۔۔۔۔

 

[عائشہ عزیز]

عائشہ بیٹا، تجوید کے قواعد کے اعتبار سے تو تمہاری بات بالکل ٹھیک ہے لیکن شاعری میں اس ق کا مطلب مختلف ہے

جی جی بھیا
میں ٹھیک والا اس لیے نہیں بتا رہی تھی کہ فاتح بھائی ہی آکر بتائیں تو اچھا ہے۔

 

[فاتح]

جی جی بھیا
میں ٹھیک والا اس لیے نہیں بتا رہی تھی کہ فاتح بھائی ہی آکر بتائیں تو اچھا ہے۔

گویا فاتح بھائی کا امتحان مقصود تھا

 

[عائشہ عزیز]

گویا فاتح بھائی کا امتحان مقصود تھا

اب سمجھے بھیا