جذبہ ان کا پیام ہے گویا ٭ راحیلؔ فاروق

[محمد عدنان اکبری نقیبی]

جذبہ ان کا پیام ہے گویا
دل علیہ السلام ہے گویا

ایک چپ صبح و شام ہے گویا
خامشی بھی کلام ہے گویا

مقتدی خود امام ہے گویا
عشق میرا ہی نام ہے گویا

تنگ دستی میں ہوں کشادہ دل
یہ مرا انتقام ہے گویا

ہم تو مرنے کے انتظار میں تھے
زندہ رہنا بھی کام ہے گویا

کعبہ سے قبر تک فقط مٹی
مرجعِ خاص و عام ہے گویا

بولتی بند کیجیے دل کی
ورنہ ترکی تمام ہے گویا

کُن تو ہم نے سنی نہیں راحیلؔ
شعر میں وہ دوام ہے گویا

راحیلؔ فاروق​

 

[یاسر شاہ]

واہ شاندار غزل -"مقتدی" اور "کن " والے اشعار کو چھوڑ کر ایک سے بڑھ کر ایک شعر -

اس شعر میں تو ایک رمز ہے :

بولتی بند کیجیے دل کی
ورنہ ترکی تمام ہے گویا

کیا نقیبی صاحب یہ رمز آپ سمجھ پائے ؟

 

[محمد عدنان اکبری نقیبی]

واہ شاندار غزل -"مقتدی" اور "کن " والے اشعار کو چھوڑ کر ایک سے بڑھ کر ایک شعر -

اس شعر میں تو ایک رمز ہے :

بولتی بند کیجیے دل کی
ورنہ ترکی تمام ہے گویا

کیا نقیبی صاحب یہ رمز آپ سمجھ پائے ؟

نہیں یاسر بھائی ،
آپ رہنمائی فرمائیں ۔

 

[یاسر شاہ]

نہیں یاسر بھائی ،
آپ رہنمائی فرمائیں ۔

بھائی صاحب !پیشکش آپ کی اور سمجھاؤں میں ؟غور تو کریں کچھ

 

[محمد عدنان اکبری نقیبی]

بھائی صاحب !پیشکش آپ کی اور سمجھاؤں میں ؟غور تو کریں کچھ

جی بہتر بھائی ۔

 

[محمد عدنان اکبری نقیبی]

بھائی صاحب !پیشکش آپ کی اور سمجھاؤں میں ؟غور تو کریں کچھ

شاید اس شعر میں راحیل بھائی نے نفس کی خواہشات کو روکنے یا ختم کرنے کا اشارہ کیا ہے ، ورنہ سارا گھمنڈ خاک میں مل جائے گا ،
بھیا ہمارے تو یہی سمجھ آئی ہے ۔

 

[یاسر شاہ]

بولتی بند کیجیے دل کی
ورنہ ترکی تمام ہے گویا

عدنان بھائی میری رائے ہے اس شعر میں "ترکی " کے سیاسی حالات کی طرف اشارہ ہے کہ اسلام کی نشاة ثانیہ کے لیےطیب اردگان کی سربراہی میں بڑی عقلمندی سے کام ہو رہا ہے اور منظر عام پہ بھی نہیں آرہا -افغانستان میں طالبان بڑے بڑے بتوں کو توڑ کر میڈیا کے سامنے آگئے -لہٰذا سخت مشکلات میں گھر گئے -

ترکی کی مثال دے کر گویا یہی سمجھایا جا رہا ہے کہ زیادہ جذباتیت نہ یہ کہ آپ کو لے ڈوبے گی بلکہ اوروں کو بھی -راحیل بھائی خود ہوتے تو شاید مزید وضاحت کرتے-

 

[عباس رضا]

اشعار کے مشمولات سے قطع نظر ”ترکی تمام شد“ یا ”ترکی تمام ہونا“ اردو میں محاورہ بھی ہے۔
(۱) گھمنڈ جاتا رہنا۔ غرور نکلنا۔ (۲) کچھ نہ باقی رہنا۔ (۳) ساری بہادری نکل جانا۔ (فیرو اللغات، ص۳۸۳۔ علاوہ ”ترکی تمام شد“)

 

[یاسر شاہ]

جزاک اللہ مجھے اس محاورے کی خبر ہی نہیں تھی -ہو سکتا ہے پھر اس کا مطلب اور ہی کچھ ہو -

 

[یاسر شاہ]

شاید اس شعر میں راحیل بھائی نے نفس کی خواہشات کو روکنے یا ختم کرنے کا اشارہ کیا ہے ، ورنہ سارا گھمنڈ خاک میں مل جائے گا ،
بھیا ہمارے تو یہی سمجھ آئی ہے ۔

آپ نے درست سمجھا شعر کو -

 

[La Alma]

شاعر شاید کیفیاتِ قلب کے اظہار کے معاملے میں عجز بیانی کا شکار ہے۔
زبانِ یارِ من ترکی و من ترکی نمی دانم

شاید اس شعر میں راحیل بھائی نے نفس کی خواہشات کو روکنے یا ختم کرنے کا اشارہ کیا ہے ، ورنہ سارا گھمنڈ خاک میں مل جائے گا ،
بھیا ہمارے تو یہی سمجھ آئی ہے ۔