حسان خان
لائبریرین
جس روز کہ تو سیر کو گلزار میں آوے
گل تازہ کھلے نکہتِ گل خار میں آوے
بالیدگی سوکھے ہوئے اشجار میں آوے
جس بزم میں تو ناز سے گفتار میں آوے
جاں کالبدِ صورتِ دیوار میں آوے
گلگشت میں پیدا ہو عجب لطف کا منظر
لے بڑھ کے بلائیں تری ہر شاخِ گلِ تر
گل تیرے قدم لینے کو ہو فرش زمیں پر
سائے کی طرح ساتھ پھریں سرو و صنوبر
تو اس قدِ دلکش سے جو گلزار میں آوے
مانا کہ غم و ہم سے دلِ زار گھلا ہے
برسا دیے مژگاں نے جو دریا بھی تو کیا ہے
آنکھیں بھی لہو روئیں تو کیا فخر ہوا ہے
تب نازِ گراں مایگیِ اشک بجا ہے
جب لختِ جگر دیدۂ خونبار میں آوے
ہرچند ہوا جوش فرو مجھ کو ستا کر
کچھ دل کو ہوئی راحت و تسکین بھی دم بھر
وہ بات بھی کر جس سے ملے لطف مکرر
دے مجھ کو شکایت کی اجازت کہ ستمگر
کچھ تجھ کو مزا بھی مرے آزار میں آوے
اعجاز کا رنگ اپنے جو دکھلائے اشارہ
بے جان کو جاں دار بنا جائے اشارہ
جادو سے غضب دیکھیے کیا ڈھائے اشارہ
اُس چشمِ فسوں گر کا اگر پائے اشارہ
طوطی کی طرح آئنہ گفتار میں آوے
مصروف دعاؤں میں ہیں کس آس سے یا رب
تا برہنہ پا گزرے کوئی پاس سے یا رب
تکتے ہیں پڑے راہ عجب یاس سے یا رب
کانٹوں کی زباں سوکھ گئی پیاس سے یا رب
اک آبلہ پا وادیِ پُرخار میں آوے
آیا مرے آغوش میں کب وہ تنِ نازک
کس دن ہوا راحت کا سبب وہ تنِ نازک
پھندے میں ہو یوں غیر کے اب وہ تنِ نازک
مر جاؤں نہ کیوں رشک سے جب وہ تنِ نازک
آغوشِ خمِ حلقۂ زنّار میں آوے
پھیلائے ہوئے دستِ طلب جو ہیں سراسر
دیکھا ہے زمانے میں انہیں خوار ہی اکثر
انساں کے لیے حرص ہی دشمن ہے قوی تر
غارت گرِ ناموس نہ ہو گر ہوسِ زر
کیوں شاہدِ گل باغ سے بازار میں آوے
مانا کہ جنوں کا ہے تجھے جوشِ فراواں
باقی ترے ہاتوں سے رہی جیب نہ داماں
یوں ٹکڑے اڑانا تو نہیں ہے تجھے شایاں
تب چاکِ گریباں کا مزہ ہے دلِ نالاں
جب اک نفس الجھا ہوا ہر تار میں آوے
کیا حالِ تپِ سوزِ دروں کہیے زباں سے
لگ جائے کہیں آگ نہ گرمی کے بیاں سے
بہتر ہے کہ پنہاں ہی رہے اہلِ جہاں سے
آتشکدہ ہے سینہ مرا رازِ نہاں سے
اے وائے اگر معرضِ اظہار میں آوے
مرزاؔ کی طرح سحر کی قسم اس کو سمجھیے
مضموں ہے اگر روح تو جسم اس کو سمجھیے
افسوں اسے ٹھہرائیے اسم اس کو سمجھیے
گنجینۂ معنی کا طلسم اس کو سمجھیے
جو لفظ کہ غالبؔ مرے اشعار میں آوے
(مرزا عزیز بیگ سہارنپوری)
خوب شراکت - جزاک اللہ 