فرخ منظور
لائبریرین
فیس بک سے اٹھائی گئی سعود عثمانی صاحب کی ایک نظم
جل پری
نیم خاک و نیم آب
اے وصالِ ٓاب و گِل ، اے رمزِ دل
اے سمندر کی سفیرِ خوشنوا
تجھ سے مل کر ہوں میں خود پر منکشف
مجھ سے بڑھ کر تُو ہے میری آشنا
تیرے گیتوں سے فضا میں چار سُو
صفحہ در صفحہ مرے دل کی کتاب
اے تہِ دل کی مکیں ، اے نازنیں
اے مری تنہائیوں کی رازداں
اے مری کیفیتِ خواب و خبر
نیند اور بیداریوں کے درمیاں
تیری آوازوں سے مجھ میں مرتعش
گہرے نیلے رنگ کی یہ سطحِ خواب
میں ترا دکھ جانتا ہوں میری دوست
کوئی تجھ سا ہے نہ مجھ سا اور ہے
ایک دنیا میں بسر کرتا ہوں میں
پھر بھی میری اصل دنیا اور ہے
اصل دنیا ، کون سی دنیا میں ہے ؟
اے جہانِ زود ہجر و دیر یاب
کچھ لکیریں میری پابندی نے بھی
کھینچ رکھی ہیں حدِ ادراک پر
نیل گُوں قلزم سے میں بھی دن ڈھلے
لوٹ آتا ہوں سنہری خاک پر
کاٹتا ہوں دو جہانوں کی تھکن
جھیلتا ہوں دو زمانوں کے عذاب
دیکھنے ہیں مجھ کو بھی اس دیس میں
نقرئی مٹی ، سنہرے زرد باغ
مچھلیوں کی سیپیوں میں جس جگہ
موتیوں کی مثل روشن ہیں چراغ
سانس لینا چاہتا ہوں میں جہاں
سانس لیتی بستیاں ہیں زیرِ آب
جل پری اے جل پری اے جل پری
دل کے رازوں سے مجھے آگاہ کر
آب خوردہ خواہشیں ، نم دیدہ غم
ان جہازوں سے مجھے آگاہ کر
جو کہیں ان وسعتوں میں غرق ہیں
تہ بہ تہ خاموشیوں میں محوِ خواب
اے مری صبح ِازل ، شام ِ ابد
اے مری وارفتگی ، اے شاعری
اے مرے موجود ہونے کی دلیل
شاعری ، اے جھٹپٹے کی روشنی
اے نگارِ نیم روز و نیم شب
اے وجود ِ نصف خاک و نصف آب
(سعود عثمانی)
جل پری
نیم خاک و نیم آب
اے وصالِ ٓاب و گِل ، اے رمزِ دل
اے سمندر کی سفیرِ خوشنوا
تجھ سے مل کر ہوں میں خود پر منکشف
مجھ سے بڑھ کر تُو ہے میری آشنا
تیرے گیتوں سے فضا میں چار سُو
صفحہ در صفحہ مرے دل کی کتاب
اے تہِ دل کی مکیں ، اے نازنیں
اے مری تنہائیوں کی رازداں
اے مری کیفیتِ خواب و خبر
نیند اور بیداریوں کے درمیاں
تیری آوازوں سے مجھ میں مرتعش
گہرے نیلے رنگ کی یہ سطحِ خواب
میں ترا دکھ جانتا ہوں میری دوست
کوئی تجھ سا ہے نہ مجھ سا اور ہے
ایک دنیا میں بسر کرتا ہوں میں
پھر بھی میری اصل دنیا اور ہے
اصل دنیا ، کون سی دنیا میں ہے ؟
اے جہانِ زود ہجر و دیر یاب
کچھ لکیریں میری پابندی نے بھی
کھینچ رکھی ہیں حدِ ادراک پر
نیل گُوں قلزم سے میں بھی دن ڈھلے
لوٹ آتا ہوں سنہری خاک پر
کاٹتا ہوں دو جہانوں کی تھکن
جھیلتا ہوں دو زمانوں کے عذاب
دیکھنے ہیں مجھ کو بھی اس دیس میں
نقرئی مٹی ، سنہرے زرد باغ
مچھلیوں کی سیپیوں میں جس جگہ
موتیوں کی مثل روشن ہیں چراغ
سانس لینا چاہتا ہوں میں جہاں
سانس لیتی بستیاں ہیں زیرِ آب
جل پری اے جل پری اے جل پری
دل کے رازوں سے مجھے آگاہ کر
آب خوردہ خواہشیں ، نم دیدہ غم
ان جہازوں سے مجھے آگاہ کر
جو کہیں ان وسعتوں میں غرق ہیں
تہ بہ تہ خاموشیوں میں محوِ خواب
اے مری صبح ِازل ، شام ِ ابد
اے مری وارفتگی ، اے شاعری
اے مرے موجود ہونے کی دلیل
شاعری ، اے جھٹپٹے کی روشنی
اے نگارِ نیم روز و نیم شب
اے وجود ِ نصف خاک و نصف آب
(سعود عثمانی)
