جو سالِ نو کا حساب لکھنا

[عینی مروت]

اپنی ایک نظم پیش خدمت ہے اور بزرگو ں سے رہنمائی کی درخواست۔۔۔۔

جو سالِ نو کا حساب لکھنا

جو سالِ نو کا حساب لکھنا
نئی رتوں پہ کتاب لکھنا
تو اے سخنور!۔
عمرِ رفتہ کے سب حسیں پل
سجا کے نوکِ قلم پہ اپنے
نئے زمانے کے خواب لکھنا!
گو ہم پہ بیتے عذاب لمحے
وہ اشک و آہوں کا باب لمحے
مگر جو لکھنا مری کہانی
تو پھر مرے حوصلوں کے صدقے
یہ خارِ گل بھی گلاب لکھنا
ہے خیمۂ جاں اگر شکستہ
ہے دامنِ دل اگر دریدہ۔۔
دھری ہے طاقِ جنوں پہ اب بھی
امیدِ نو کی شمعِ فروزاں
جوان جذبوں کی خیر یا رب
نہ انکو ٹوٹی طناب لکھنا!
قمر امیدوں کا بام پر ہے
یہ ایک لمحہ دوام پر ہے
یہ کاسۂ دست پھر اٹھا ہے
لرزتے ہونٹوں پہ اک دعا ہے
اے میری فریاد سننے والے
مری دعا مستجاب لکھنا!

ْْ
نورعینی