جھوٹھیا جہان دیا - شریف کنجاہی

[تلمیذ]

جیبھ دیا کچیا
کیتا قول ہاریو ای
میرا اگ ماریو ای
چھڈیا ای مینوں کسے پاسے وی نہ جان جوگا
کسے نہ جہان جوگا
ہان دیاں کُڑیاں نوں مونہہ دِکھلان جوگا

تیرے پِچھے جھلّیاں میں سبھے بدنامیاں
گھر دیاں جھڑکاں
اج مینوں پتہ لگا
دُدّھ دے بُھلیکھے میں تاں پانی پئی رِڑکاں
جھوٹھیا جہان دیا

تیرے ؔآکھے لگ کے میں مُوہوں آپوں بول کے تے ماپیاں دی منگ چھڈی
اوہناں دی میں جیبھ وڈھی
گھوڑی اُتے چڑھ بیٹھوں ، شرم نہ آئی تینوں
ہن دے جواب مینوں
ساڈے نالوں وڈا کوئی جُھگا وی نہ ویکھ بُھلوں
زِویں بھانڈے ولّوں اسیں کسے نالوں گھٹ نئیں ساں
اسیں کیہڑے جٹ نئیں ساں

تھُک کے تے چٹیو ای
رب کولوں پائیں
شالا اگے آوے آپنے ای
جیہا سانوں پٹیو ای


------ شریف کنجاہی

 

[قیصرانی]

واہ جی واہ

 

[عمر سیف]

واہ بہت خوب ۔۔۔

 

[محمد وارث]

ودیا جی بہت ودیا، زبردست، کنجاہی ہوراں وی کمال کیتا اے۔

۔

 

[عبدالقیوم چوہدری]

سوہنا کلام