مجید امجد جینے والے ۔ مجید امجد

[فرخ منظور]

جینے والے
..............
کیا خبر صبح کے ستارے کو
ہے اسے فرصتِ نظر کتنی
پھیلتی خوشبوؤں کو کیا معلوم
ہے انہیں مہلتِ سفر کتنی
برقِ بےتاب کو خبر نہ ہوئی
کہ ہے عمرِ دمِ شرر کتنی
کبھی سوچا نہ پینے والے نے
جام میں مے تو ہے مگر کتنی
دیکھ سکتی نہیں مآلِ بہار
گرچہ نرگس ہے دیدہ ور کتنی
جانے کیا زندگی کی جاگتی آنکھ
ہو گئی اس کی شب بسر کتنی
شمعِ خود سوز کو پتہ نہ چلا
دور ہے منزلِ سحر کتنی
مسکراتی کلی کو اس سے غرض
کہ ہے عمر اس کی مختصر کتنی
جینے والوں کو کام جینے سے
زندگی کا نظام جینے سے

مجید امجد​

 

[ایس ایس ساگر]

واہ۔ بہت خوب۔شئیر کرنے کا بہت شکریہ۔

 

[منہاج علی]

بہت خوبصورت نظم ہے۔! کیا کہنا کیا کہنا!