جینے کی راہ برائے اصلاح

[ارشد چوہدری]

بحر --- ہزج مثمن سالم ( مفاعیلن مفاعیلن مفاعیلن مفاعیلن )
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
خدا کو جان دینی ہے خدا کے پاس جانا ہے
نہیں دنیا تو گھر تیرا یہ اک وقتی ٹھکانا ہے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
تمہیں دنیا میں رہنا ہے ذرا دامن بچا کر ہی
تمہیں خود کو یہاں رہ کر گناہوں سے بچانا ہے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
گناہوں سے جو بچتے ہیں رضا رب کی وہ پاتے ہیں
اسی دنیا میں رہنا ہے اسی مقصد کو پانا ہے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
تمہیں کوئی ضرورت ہو تو مانگو تم خدا سے ہی
اگر تجھ کو ہے دکھ کوئی تو رب کو ہی بتانا ہے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
اگر کوئی خطا ہو تو خدا کے پاس جاؤ تم
وہی تیرا ہے مالک تو تمہیں اُس کو منانا ہے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
ہماری تو ضرورت ہے ملے ہم کو رضا رب کی
اگر مقصد کو پانا ہے تو اشکوں کو بہانا ہے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
جھکا لو تم تو سر اپنا خدا کے سامنے ارشد
منانا ہے اگر رب کو تو دنیا کو بھلانا ہے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

 

[ارشد چوہدری]

الف عین

 

[الف عین]

مجھے مکیش کا گانا یاد آ گیا
سجن رے جھوٹ مت بولو خدا کے پاس جانا ہے
خدا کو جان دینی ہے خدا کے پاس جانا ہے
نہیں دنیا تو گھر تیرا یہ اک وقتی ٹھکانا ہے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ دوسرے مصرعے میں 'تو' برا لگ رہا ہے
یوں کہو تو
یہ دنیا گھر نہیں تیرا......
میری خواہش ہے کہ آپ سبھی اصلاح سخن میں پوسٹ کرنے سے پہلے خود ہی یہ ایکسرسائز کر لیا کریں کہ کیا متبادل بہترین ہے۔ کاتا اور لے دوڑی نہ کریں

تمہیں دنیا میں رہنا ہے ذرا دامن بچا کر ہی
تمہیں خود کو یہاں رہ کر گناہوں سے بچانا ہے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
گناہوں سے جو بچتے ہیں رضا رب کی وہ پاتے ہیں
اسی دنیا میں رہنا ہے اسی مقصد کو پانا ہے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ دو لخت ہے

تمہیں کوئی ضرورت ہو تو مانگو تم خدا سے ہی
اگر تجھ کو ہے دکھ کوئی تو رب کو ہی بتانا ہے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ شتر گربہ ہے تو کی جگہ تم کہو، خدا اور رب دونوں کی ضرورت نہیں یا کم از کم 'ہی' سے چھٹکارا پانے کے لیے 'اسی رب' استعمال کیا جا سکتا ہے

اگر کوئی خطا ہو تو خدا کے پاس جاؤ تم
وہی تیرا ہے مالک تو تمہیں اُس کو منانا ہے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ وہی شتر گربہ! دو عدد 'تو' بھی پسند نہیں
وہی مالک تمہارا ہے.....
الفاظ بدل کر پھر کوشش کریں دونوں مصرعوں میں

ہماری تو ضرورت ہے ملے ہم کو رضا رب کی
اگر مقصد کو پانا ہے تو اشکوں کو بہانا ہے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ سمجھ نہیں سکا یا دو لخت ہے واضح کریں

جھکا لو تم تو سر اپنا خدا کے سامنے ارشد
منانا ہے اگر رب کو تو دنیا کو بھلانا ہے
۔۔۔۔۔۔۔۔۔۔۔۔۔۔۔۔۔۔۔۔۔ یہ بھی دو لخت!
پوری غزل /حمد میں ایسا لگتا ہے کہ کسی بھی شعر کا اول مصرع کسی دوسرے شعر کے ثانی مصرع سے جوڑ دیں تو بھی کچھ نہ کچھ مطلب برآمد ہو ہی سکتا ہے

 

[ارشد چوہدری]

تبدیلیوں کے بعد دوبارا
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
خدا کو جان دینی ہے خدا کے پاس جانا ہے
نہیں دنیا تو گھر تیرا یہ بس وقتی ٹھکانا ہے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
تجھے چلنا پڑے گا بس ذرا دامن بچا کر ہی
ہمیشہ کے لئے خود کو گناہوں سے بچانا ہے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
گناہوں سے جو بچتے ہیں رضا رب کی وہ پاتے ہیں
بچو تم سب خطاؤں سے اگر مقصد کو پانا ہے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
اُسی رب سے ملے گا سب ضرورت جو بھی تیری ہے
اگر دکھ ہے تجھے کوئی خدا کو سب بتانا ہے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
اگر تم سے خطا ہو تو اسی رب سے دعا مانگو
وہی بخشے خطاؤں کو تمہیں اس کو منانا ہے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
رضا رب کی ملے ہم کو اسی کی بس دعا مانگو
کرو اس کی عبادت تم اگر مقصد کو پانا ہے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
ہمیشہ سر جھکے تیرا خدا کے در پہ ہی ارشد
منا لینا خدا کو اب اسی کے پاس جانا ہے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

 

[ارشد چوہدری]

الف

 

[ارشد چوہدری]

الف عین

 

[الف عین]

مطلع میں کوئی تبدیلی نہیں اگرچہ میں نے ایک ٹکڑا بھی تجویز کیا تھا
تجھے چلنا پڑے گا بس ذرا دامن بچا کر ہی
ہمیشہ کے لئے خود کو گناہوں سے بچانا ہے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔یہ شاید چھوٹ گیا تھا مجھ سے،
بس ذرا دامن بچانا سے لگتا ہے کہ باقی گندا ہو جائے تو کوئی بات نہیں۔ اگر میری یادداشت دھوکا نہیں دے رہی ، شاید حضرت علی رضی اللہ عنہ نے تقوی کی تعریف یہی کی تھی کہ خار دار جھاڑیوں والے رستے میں دامن بچا کر چلنا ۔ کچھ یوں کہہ سکتے ہیں کہ
بہت کانٹے ہیں رستے میں سنبھالو اپنے دامن کو

گناہوں سے جو بچتے ہیں رضا رب کی وہ پاتے ہیں
بچو تم سب خطاؤں سے اگر مقصد کو پانا ہے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ٹھیک

اُسی رب سے ملے گا سب ضرورت جو بھی تیری ہے
اگر دکھ ہے تجھے کوئی خدا کو سب بتانا ہے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ یہ بھی روانی چاہتا ہے مثلاً
وہی داتا ہے اپنی ہر ضرورت اس سے مانگو تم
اگر تکلیف ہے کوئی اسی رب کو دکھانا ہے

اگر تم سے خطا ہو تو اسی رب سے دعا مانگو
وہی بخشے خطاؤں کو تمہیں اس کو منانا ہے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ دوسرے مصرعے کو یوں کہیں وہی ہے بخشنے والا. تمہیں اس کو منانا ہے

رضا رب کی ملے ہم کو اسی کی بس دعا مانگو
کرو اس کی عبادت تم اگر مقصد کو پانا ہے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ٹھیک

ہمیشہ سر جھکے تیرا خدا کے در پہ ہی ارشد
منا لینا خدا کو اب اسی کے پاس جانا ہے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ دو اشعار میں منا لینا اچھا نہیں لگتا یہاں کوئی دوسری بات کہو