طارق شاہ
محفلین
مولانا حسرت موہانی
غزل
حالِ مجبوریِ دل کی نِگراں ٹھہری ہے
دیکھنا وہ نِگہِ ناز کہاں ٹھہری ہے
ہجرساقی میں یہ حالت ہے کہ آجائے سُرُور
بُوئے مے وجہِ غمِ بادہ کشاں ٹھہری ہے
کیوں نہ مامُور غمِ عشق ہو دُنیائے خیال
شکلِ یار آفتِ ہر پِیر و جواں ٹھہری ہے
جس طبیعت پہ ہمیں نازِ حق آگاہی تھا
اب وہی شیفتۂ حُسنِ بُتاں ٹھہری ہے
یار بے نام و نشاں تھے تو اُسی نِسبت سے
لذّتِ عِشق بھی بے نام و نِشاں ٹھہری ہے
فصلِ گُل دُھوم سے آئی ہے پر، اے رشکِ بہار
اِک تِرے پاس نہ ہونے سے خِزاں ٹھہری ہے
خیر گزُری، کہ نہ پُہنچی تِرے در تک ورنہ
آہ نے آگ لگادی ہے ، جہاں ٹھہری ہے
بخششِ یار جو منسُوب تھی مجھ سے، وائے !
اب وہی ، مایۂ نازِ دِگراں ٹھہری ہے
دُشمنِ شوق کہے ، اور تجھے سو بار کہے !
اِس میں ٹھہرے گی نہ حسرت کی زباں ٹھہری ہے
مولانا حسرت موہانی
اس زمین میں فیض صاحب کی مشہورِزمانہ غزل بھی خُوب ہے
آخری تدوین:
