حسن رضا حسن رضا بریلوی ، غزل: مریض ہجر اُمید سحر نہیں رکھتا

[ڈاکٹر مشاہد رضوی]

مریض ہجر اُمید سحر نہیں رکھتا​

کلام: شاگرد داغ استاذ زمن علامہ حسن رضا بریلوی ​

مریض ہجر اُمید سحر نہیں رکھتا​

غضب ہے پھر بھی وہ غافل خبر نہیں رکھتا​

یہ پھنک رہا ہوں تپِ عشق و سوزِ فرقت میں​

کہ مجھ پہ ہاتھ کوئی چارہ گر نہیں رکھتا​

گلہ ہے اُس سے تغافل کا حضرتِ دل کو​

جو مستِ ناز ہے اپنی خبر نہیں رکھتا​

تجھے رقیب کی کرنی پڑے گی چارہ گری​

سمجھ تو کیا مرا نالہ اَثر نہیں رکھتا​

تلاشِ مست تغافل میں میرا گم ہونا​

وہ مبتدا ہے جو کوئی خبر نہیں رکھتا​

ہم اُن سے پوچھیں سبب رنج بے سبب کا کیوں​

رقیب ہم سے عداوت مگر نہیں رکھتا​

غضب ہے آہ مری حالت تباہ مری​

وہ اس لیے مجھے پیشِ نظر نہیں رکھتا​

مگر قریب ہے اب کوئے قاتلِ عالم​

کہ مجھ سے آگے قدم راہبر نہیں رکھتا​

سوائے ڈیوڑھے ہیں بازارِ عشق میں اُس کے​

جو فکرِ نفع و خیالِ ضرر نہیں رکھتا​

کہو تو بزمِ عدو کا کہوں مفصل حال​

تمہیں خبر ہے کہ میں کچھ خبر نہیں رکھتا​

نگاہِ ناز سے اب کس لیے مجھے دیکھیں​

حسنؔ میں دل نہیں رکھتا جگر نہیں رکھتا​

 

[مدیحہ گیلانی]

واہ سبحان الله !! کیا خوبصورت غزل ہے۔​

کہو تو بزمِ عدو کا کہوں مفصل حال​

تمہیں خبر ہے کہ میں کچھ خبر نہیں رکھتا۔​

بہت خوب !​

 

[مہ جبین]

ہم اُن سے پوچھیں سبب رنج بے سبب کا کیوں
رقیب ہم سے عداوت مگر نہیں رکھتا
واہ کیا بات ہے
لاجواب کلام