حیدرآبادی (دکنی) ڈبل کا میٹھا

[عندلیب]

حیدرآبادی (دکنی) ڈبل کا میٹھا​

اجزاء :
ڈبل روٹی ۔۔۔۔ 12 تا 15 پیس ( اطراف کے کونے نکال دیں ، تکون شکل میں کاٹ لیں اور آدھ گھنٹے کے لئے دھوپ میں سکھائیں)۔
(یاد رہے کہ ڈبل روٹی سے مراد میٹھے کی ڈبل روٹی ہے ، عام والی ڈبل روٹی نہیں جو سینڈوچ وغیرہ بنانے کے کام آتی ہے۔ دونوں اقسام میں تھوڑا سا فرق ہوتا ہے۔ اگر میٹھے والی ڈبل روٹی دستیاب نہ ہو تو عام ڈبل روٹی بھی استعمال میں لائی جا سکتی ہے)۔

اصلی گھی ۔۔۔۔۔ 1 کیلو
شکر۔۔۔ حسب ذائقہ ۔
بادام ۔۔۔ 50 گرام
کاجو ۔۔۔۔ 50 گرام
( بادام اور کاجو کو دو تین گھنٹے کے لئے بھگو کر ان کی آدھی تعداد کو پیس لیں اور باقی آدھی مقدار کو باریک کاٹ لیں )
الائچی ۔۔۔۔ 10 سے 12 عدد (باریک پیس لیا جائے)
دودھ ۔۔۔۔۔۔ 2 کپ ( چاہیں تو کنڈینزملک کا بھی استعمال کیا جاسکتا ہے )
کھوا ۔۔۔۔ 100 گرام
زعفران ۔۔۔۔ تھوڑا سا
زعفرانی رنگ ۔۔۔ ایک دو چٹکی ۔۔

ترکیب :
1۔ سب سے پہلے شکر میں پا نی ڈال کر شیرہ بنا لیں اور پھر اسے ٹھنڈا کر لیں ۔۔
2۔ بریڈ کے ٹکڑوں کو گھی میں اچھی طرح براؤن فرائی کریں مگر جلانے سے پرہیز کریں۔
3 ۔ اب کھلے منہ والے برتن میں دودھ ، زعفران اور زعفرانی رنگ ڈال کر اچھی طرح مکس کر لیں ،اب اس میں بریڈ کے پیسس یوں ارینج کریں کہ ایک پیس دوسرے پیس کے اوپر نہ آئے اسی لئے برتن تھوڑا چوڑا اور کھلا ہوا استعمال کرنا چاہیئے ۔
4۔ اب ان اجزاء کو دو تین منٹ کے لئے پکائیں۔ پھر اس میں شیرہ (جو پہلے ہی ٹھنڈا کیا ہوا ہے) ، کھوا اور پسے ہوئے ڈرائی فروٹس مع الائچی ڈال دیں۔ ان سب کو پانچ منٹ تیز آنچ پر پکائیں دھیان رکھیں کے نیچے داغ نہ لگنے پائے اور چمچ بھی احتیاط سے ہلائیں تاکہ بریڈ اپنی اصلی حالت میں رہ سکے۔
پھر اس کے بعد مزید پانچ منٹ مدھم آنچ پر رکھ دیں ۔
5۔ ٹھنڈا ہونے پرکسی برتن میں نکال کر باریک کاٹے ہوئے ڈرائی فروٹس ڈال دیں اور چاندی کا ورق لگا دیں ۔

نوٹ ۔
اس ترکیب میں صرف بادام اور کاجو کا استعمال لکھا گیا ہے جبکہ حسب خواہش تمام اقسام کی ڈرائی فروٹس کا استعمال بھی کیا جا سکتا ہے۔

 

[زیک]

بہت شکریہ عندلیب۔

گھی کا متبادل مکھن استعمال کیا جا سکتا ہے؟

کاجو کیا cashew کو کہتے ہیں؟

 

[عندلیب]

مکھن کے استعمال سے کچھ ناگوار بو پیدا ہو جاتی ہے۔ اصلی گھی کے ریڈی میڈ ڈبے ملتے ہیں امریکن میڈ ، آپ وہی استعمال کریں
کاجو کو تو انگریزی میں cashew ہی کہا جاتا ہے

 

[سارا]

کیا عام کوکنگ آئل استعمال کیا جا سکتا ہے۔۔ یا اصلی دیسی گھی ہی استعمال کرنا ضروری ہے۔۔

 

[ماوراء]

عندلیب، ترکیب اچھی ہے۔ کچھ کچھ شاہی ٹکڑوں کی ترکیب سے مل رہی ہے۔ کیا یہ کھانے کے بعد سویٹ ڈش کے طور پر پیش کی جاتی ہے یا پھر۔۔؟

 

[ماوراء]

اوکے۔۔شاید شاہی ٹکڑے اور ڈبل کا میٹھا ایک ہی چیز ہے۔
اس تصویر سے یہی لگتا ہے۔

 

[زیک]

ماوراء میرا خیال ہے ڈبل کا میٹھا شاہی ٹکڑوں کی حیدرآبادی قسم ہے۔

اور آپ تصویر بھی ڈھونڈ کر لائیں تو میری ہی دوست کی۔

 

[ماوراء]

اچھا۔۔چلیں یہ ترکیب بھی آزماؤں گی۔

تصویر آپ کی دوست کی۔۔؟ یہ تو اتفاق ہو گیا۔ کافی ماہرہ لگتی ہیں۔ ترکیبیں نہیں کہیں لکھتیں؟ پیزا دیکھ کر تو مجھے بھوک لگ گئی ہے۔

 

[زیک]

یہ رہا اس کا کھانوں کا بلاگ

 

[سارا]

یہ لیں میں نے بنا لیا ہے الحمد للہ۔۔

 

[زیک]

زبردست سارا۔ آپ تو کافی تیز نکلیں۔

کھوے اور گھی کی جگہ آپ نے کیا استعمال کیا؟

کھوے کی جگہ کیا ricotta cheese کام کرے گا؟

 

[سارا]

میں نے دیسی گھی استعمال نہیں کیا وہ مجھے پسند نہیں۔۔ریگولر آئل استعمال کیا تھا۔۔۔اور کھوا ہی استعمال کیا تھا پاکستانی انڈین اسٹور پر آسانی سے مل جاتا ہے۔۔البتہ چیز کے بارے میں مجھے نہیں معلوم کہ اس کا ٹیسٹ کھوے کی طرح ہی ہے یا نہیں

 

[زین]

یہ لیں میں نے بنا لیا ہے الحمد للہ۔۔

واہ اتنی جلدی بنا بھی لیا

 

[ماوراء]

واہ زبردست سارا۔ ماشاءاللہ اتنی سگھڑ بچی۔۔خاموشی سے کھانا بنا کر لے بھی آئی۔ میں تو خوب شور مچاتی ہوں تاکہ سب کو پتہ چلے کہ میں کام کر رہی ہوں۔

اچھا بتاؤ۔۔مزے کے بنے ہیں؟ اور یہ کہ جب بریڈ کو دودھ میں ڈالنا ہے تو بریڈ ٹوٹتی نہیں ہے؟
مجھے چھٹیاں ہیں، ایک دن بناتی ہوں یہ بھی۔ لیکن کھوے کے بغیر۔۔وہ اتنی دور سے جا کر لانا پڑے گا۔

 

[ابن سعید]

زکریا بھائی اتنی ساری چیزوں کا بدل استعمال کریں گے تو ڈش کچھ کی کچھ ہو جائے گی۔

ویسے ہم نے تھوڑے کم اہتمام کے ساتھ شاہی ٹکڑے بہت بنائے ہیں۔

 

[سارا]

واہ زبردست سارا۔ ماشاءاللہ اتنی سگھڑ بچی۔۔خاموشی سے کھانا بنا کر لے بھی آئی۔ میں تو خوب شور مچاتی ہوں تاکہ سب کو پتہ چلے کہ میں کام کر رہی ہوں۔

اچھا بتاؤ۔۔مزے کے بنے ہیں؟ اور یہ کہ جب بریڈ کو دودھ میں ڈالنا ہے تو بریڈ ٹوٹتی نہیں ہے؟
مجھے چھٹیاں ہیں، ایک دن بناتی ہوں یہ بھی۔ لیکن کھوے کے بغیر۔۔وہ اتنی دور سے جا کر لانا پڑے گا۔

میرا کل سے شمشاد بھائی کی بتائی ہوئی کھیر بنانے کا دل کر رہا تھا اور میں کنڈینس ملک لانا بھول گئی تھی ماموں صبح جا رہے تھے انہیں کہا تو وہ اسی سے ملتا جلتا کچھ اور لے آئے تھے اور میرے پاس آج پورا دن گاڑی نہیں تھی۔۔جب یہ ترکیب دیکھی تو سب ہی سامان گھر میں موجود تھا اسی وقت سوچا بنا لوں البتہ بریڈ دھوپ میں نہیں سینکیں ہیں اس وقت شام کا وقت تھا اور دھوپ تقریبا چلی گئی تھی کچھ سیکنڈ ٹوسٹر میں رکھی تھی۔۔

بریڈ جب تلو گی تو وہ اکڑ جائے گی ٹوٹے گے نہیں لیکن جو چولہے پر پکانے کے 8 سے 10 منٹ ہیں وہ بہت احتیاط کرنی ہے۔۔مجھے سب سے مشکل کام اس کو بننے کے بعد نکالنا لگا تھا کہ اس وقت نرم ہوتی ہیں اور ٹوٹنے کا ڈر ہوتا ہے۔۔ویسے کھوے کا اچھا ٹیسٹ آجاتا ہے نہ بھی ڈالو تو اتنا فرق نہیں پڑتا میرے خیال سے۔۔ شیرا تھوڑا کم بنانا اور چینی حساب سے ڈالنا۔۔مجھ سے ہلکی سی زیادہ ہو گئی تھی۔۔ میں نے شیرے میں ہی الائچی ڈالی تھی اس سے شیرے میں بھی الائچی کا اچھا ٹیسٹ آ گیا تھا۔۔۔ویسے ذائقہ مزے کا تھا۔۔

 

[سارا]

واہ اتنی جلدی بنا بھی لیا

جی بنانے میں اتنا زیادہ ٹائم نہیں لگتا۔۔اور سب سامان گھر میں موجود تھا اس لیے کچھ زیادہ جلدی بن گئے۔۔

 

[ابوشامل]

واہ جی واہ بہت خوب۔۔۔۔ یہاں کراچی میں حیدرآبادیوں کی شادیوں میں بگھارے بینگن اور ڈبل کا میٹھا ضرور ہوتا "تھا" اب یہ رحجان کم ہوتا جا رہا ہے۔ آج سے قریباً 20 سال قبل کسی حیدرآبادی خاندان میں شادی ہو اور وہاں بگھارے بینگن، ڈبل کا میٹھا اور رائتوں کی ٹنکیاں نہ ہوں تو شادی شادی نہیں سمجھی جاتی تھی

 

[زیک]

زکریا بھائی اتنی ساری چیزوں کا بدل استعمال کریں گے تو ڈش کچھ کی کچھ ہو جائے گی۔

ترکیب کو Americanize کرنے کی کوشش کر رہا ہوں۔

 

[زونی]

شکریہ عندلیب شئیر کرنے کیلئے !
، شاہی ٹکڑوں کا حیدرآبادی ورژن ھے یہ تو لیکن اس میں شیرا الگ سے نہیں بنایا جاتا بلکہ دودھ میں چینی ڈالی جاتی ھے اور دودھ زیادہ استعمال ہوتا ھے ۔