قابل اجمیری حیرتوں کے سلسلے سوزِ نہاں تک آگئے۔۔۔۔قابل اجمیری

[محمود احمد غزنوی]

حیرتوں کے سلسلے سوزِ نہاں تک آگئے
ہم نظر تک چاہتے تھے تم تو جاں تک آگئے

نامرادی اپنی قسمت ، گمرہی اپنا نصیب
کارواں کی خیر ہو ، ہم کارواں تک آگئے

انکی پلکوں پر ستارے اپنے ہونٹوں پر ہنسی
قصہء غم کہتے کہتے ہم کہاں تک آگئے

اپنی اپنی جستجو ہے اپنا اپنا شوق ہے
تم ہنسی تک بھی نہ پہنچے ہم فغاں تک آگئے

زلف میں خوشبو نہ تھی یا رنگ عارض میں نہ تھا
آپ کس کی آرزو میں گلستاں تک آگئے

رفتہ رفتہ رنگ لایا جذبِ خاموشیءِ عشق
وہ تغافل کرتے کرتے امتحاں تک آگئے

خود تمہیں چاکِ گریباں کا شعور آجائے گا
تم وہاں تک آتو جاوء ، ہم جہاں تک آگئے

آج قابل میکدے میں انقلاب آنے کو ہے
اہلِ دل اندیشہء سود و زیاں تک آگئے​

 

[مغزل]

کیا کہنے محمود صاحب ، واہ واہ ، سبحان اللہ سبحان اللہ ، صاحب ۔۔ ہماری تو مراد پوری کردی آپ نے ۔۔ وہ کیا ہے کہ:
چھوا اس کے نازک ہاتھ کو کچھ اس انداز سے کہ روزہ بھی محفوظ رہا افطاری بھی ہوگئی ، والا معاملہ ہے ۔ واہ

 

[عمران شناور]

نہایت عمدہ کلام ہے۔ شکریہ محمود غزنوی صاحب۔

 

[محب علوی]

زبردست کلام ہے اور بہت شکریہ شئیر کرنے کا

 

[فاتح]

خود تمہیں چاکِ گریباں کا شعور آجائے گا
تم وہاں تک آتو جاوء ، ہم جہاں تک آگئے​

قابل اجمیری کی نہایت ہی عمدہ غزل شریکِ محفل کرنے پر شکریہ!

 

[الف نظامی]

خود تمہیں چاکِ گریباں کا شعور آجائے گا
تم وہاں تک آتو جاوء ، ہم جہاں تک آگئے

 

[جیا راؤ]

رفتہ رفتہ رنگ لایا جذبِ خاموشیءِ عشق
وہ تغافل کرتے کرتے امتحاں تک آگئے


واہ۔۔۔۔ بہت خوبصورت غزل ہے۔۔۔
شاملِ محفل کرنے کا شکریہ۔۔۔

 

[محب علوی]

حیرتوں کے سلسلے سوزِ نہاں تک آگئے
ہم نظر تک چاہتے تھے تم تو جاں تک آگئے

کیا کہنے ، آج پھر سے پڑھی اور پھر بہت لطف آیا۔

آشا نے گائی بھی بہت اچھی ہے

 

[ظہیراحمدظہیر]

کیا خوبصورت غزل ہے !!! جب بھی پڑھئے ہر بار ایک نیا لطف آتا ہے!! اور اعلی شاعری کی علامت بھی یہی ہے ۔ قابل اجمیری میرے پسندیدہ ترین شاعروں میں سے ہیں ۔ دستِ اجل نے انہیں مہلت نہیں دی اور وہ عین جوانی میں رخصت ہوگئے ورنہ یقین تھا کہ وہ اردو کے آسمانِ شعر پر سورج کی طرح چمکتے ۔
اس انتخاب کے لئے بہت شکریہ غزنوی صاحب!

 

[محمود احمد غزنوی]