خورشید الاسلام: یہ مانا نت نئے فتنے، عجب رنج و محن جاگے

[فہد اشرف]

غزل

یہ مانا نت نئے فتنے، عجب رنج و محن جاگے
مگر یہ بھی تو دیکھو چار سو کیا کیا چمن جاگے

بجھے بیٹھے رہیں کب تک بس اب شیشے کو چھلکاؤ
لہو چہکے، نفس مہکے، خرد ناچے، بدن جاگے

خمارِ بے دلی حد سے فزوں ہے اور دل تنہا
کوئی ایسی غزل چھیڑو کہ ہر داغِ کہن جاگے

کہو گیسوئے مشکیں سے کہ بادل جھوم کے اٹھیں
ذرا بندِ قبا کھولو کہ گل کی انجمن جاگے

کوئی ایسی بھی ساعت ہو، کوئی ایسی بھی شب آئے
کہ میری حسرتیں سو جائیں، تیرا بانکپن جاگے

چلے ساغر، ہلیں دامن، ملے سینہ، جھکیں نظریں
ستارے جگمگا اٹھیں، زمیں سوئے گگن جاگے

خمارِ آرزو اس رنگ اس انداز سے ٹوٹے
کہ تم شانے پہ سر رکھو تو بستر کی شکن جاگے

کتاب جسم نرمی سے ورق اندر ورق دیکھیں
حجاب شوق گرمی سے شکن اندر شکن جاگے

بدن تھک جائیں شل ہو جائیں آنکھیں بند ہو جائیں
گلے سے لگ کے یوں سوئیں چمن اندر چمن جاگے

عجب عالم دکھایا ہے تری کافر ادائی نے
جوانانِ خطا ابھرے، غزالانِ ختن جاگے

یہی شانِ کریمی ہے، یہی کارِ چمن بندی
کہ جب غنچے کا دل شق ہو تو گل کا پیرہن جاگے

پیو وہ شے جو ہم پیتے ہیں، جم پیتا تھا زمزم کیا
جسے پینے سے اے واعظ نہ تن جاگے نہ من جاگے

(خورشید الاسلام)​