دائرے

[زرقا مفتی]

دائرے​

دائروں کا مرکز ہوں،​

خا مشی کا مظہر ہوں​

ان کہی کہانی ہوں​

دائروں کا مرکز ہوں!​

اک مری محبت کا، اک تری ضرورت کا​

اک تری اجازت کا، خواہشوں کی شدت کا​

لمس اُس کی قُربت کا، اور تیری فرصت کا​

اک مرے مقدر کا​

دائروں کا مرکز ہوں!​

محافظ مہرباں بھی ہیں​

یہ مدار یہ حصار​

جفاکار صیاد بھی​

یہ مدار یہ حصار​

مجھ کو گھیرے رہتے ہیں​

یہ حصار​

مجھ کو روک لیتے ہیں​

یہ مدار​

چھوڑ بھی نہیں سکتی اپنے ان مداروں کو​

توڑ بھی نہیں سکتی اپنے ان حصاروں کو​

مجھ ہی سے تو باقی ہیں​

مجھ ہی سے تو زندہ ہیں​

یہ تو مرا حصہ ہیں​

یہ مدار یہ حصار​

دائروں کا مرکز ہوں!​

کتنے آسمانوں کی ​

میں زمین ٹھہری ہوں​

اک مری وفا کا ہے​

اک مری انا کا ہے​

اک مری حیا کا ہے​

ایک میری چاہت کا ​

ایک میری ہستی کا​

ایک گھر گرہستی کا​

مجھ پہ ہیں سایہ فگن یہ مرے آسماں​

کبھی ہوتے ہیں مجھ پہ مہرباں​

یہ مر ے آسماں ​

کبھی گراتے ہیں مجھ پہ بجلیاں​

یہ مرے آسماں​

مجھے رہنا یہیں ہے ​

انہی آسمانوں تلے​

مجھے سہنا سبھی ہے​

انہی آسمانوں تلے​

مجھ ہی سے تو ہیں قائم​

یہ سائبان یہ مرے آسمان​

دائروں کا مرکز ہوں!​

اپنی سب اُمیدوں کے​

حاصلوں کی حسرت ہوں​

خامشی کا مظہر ہوں​

ان کہی کہانی ہوں​

دائروں کا مرکز ہوں!​

زرقا مفتی​

 

[سید شہزاد ناصر]

بہت خوب اچھی نظم کہی آپ نے
شاد و آباد رہیں

 

[قیصرانی]

خوب

 

[نایاب]

بہت خوب لاجواب نظم کیا ہے حقیقتوں کو
بہت سی دعاؤں بھری داد آپ کے نام محترم بہنا

 

[محمد وارث]

خوب نظم ہے مفتی صاحبہ، لاجواب

 

[شہزاد وحید]

بہت اچھی تحریر ہے۔