دل کو سکون روح کو بالیدگی ملی

[محمود احمد غزنوی]

کچھ عرصہ قبل ایک نعت لکھی تھی۔ ۔ ۔ ۔آج جمعتہ المبارک کی مناسبت سے پیش کررہا ہوں۔ ۔ ۔

دل کو سکون روح کو بالیدگی ملی
ذکرِ محمدّی سے نئی زندگی ملی
کلیوں نے ترا نام ہی چپکے سے لیا تھا
اک آن میں پھولوں کو نئی زندگی ملی
'لو لاک لما خلق' کی تنویر ہیں تارے
تیرے ظہور سے جنہیں تابندگی ملی
جلوت جسے کہتے ہیں، خلوت ہے سراسر
بندوں کو اک نئی روشِ بندگی ملی
پیچ و خمِ حیات سے گھبرا نہیں سکتے
جنکو ترے صراط سے وابستگی ملی
اے بادشاہِ جود و سخا، مجھ پہ اک نظر
تیری نظر سے سب کو نئی زندگی ملی
اک گھونٹ فقط بادہءِ الفت کا عطا ہو
مجھ کو تمام عمر یہی تشنگی ملی​

 

[مغزل]

سبحان اللہ جناب ، اللہ توفیقات میں اضافہ فرمائے ۔

 

[الف عین]

محمود غزنوی، اب تم خود ہی اس کی تقطیع کرنے کی کوشش کرو کہ کون کون سے مصرعے کس بحر میں ہیں، اور کس بحر میں سب کو ڈھالا جائے۔ اس کے بعد میں ’ایکسپرٹ اوپینیئن‘ دوں گا اپنا۔

 

[عثمان رضا]

جزاک اللہ آمین
بہت خوب

 

[محمود احمد غزنوی]

محمود غزنوی، اب تم خود ہی اس کی تقطیع کرنے کی کوشش کرو کہ کون کون سے مصرعے کس بحر میں ہیں، اور کس بحر میں سب کو ڈھالا جائے۔ اس کے بعد میں ’ایکسپرٹ اوپینیئن‘ دوں گا اپنا۔

میں کتاب 'فاعلات' کا مطالعہ کر رہا ہوں، ابھی اتنی لیاقت پیدا نہیں ہوئی کہ تقطیع کر کے بحر کو نامزد کرسکوں۔ ۔ ۔اگر آپ اس نعت کے وزن ، بحر اور تقطیع کے بارے میں خود ہی کچھ ارشاد فرمائیں مشکور ہونگا اور میرے لئیے 'فاعلات' کے اسباق مزید واضح ہو جائیں گے۔

 

[الف عین]

دل کو سکون روح کو بالیدگی ملی
ذکرِ محمدّی سے نئی زندگی ملی

یہ مطلع ہے جس کے دونوں مصرع ایک ہی بحر میں ہیں
مفعول فاعلات مفاعیل فاعلن/فاعلات (آخری رکن دونوں طرح آ سکتا ہے) اب کوشش کرو کہ دوسرے مصرعوں کو بھی اسی بحر میں ڈھال سکو تو۔۔

 

[محمود احمد غزنوی]

دل کو سکون روح کو بالیدگی ملی
ذکرِ محمدّی سے نئی زندگی ملی

یہ مطلع ہے جس کے دونوں مصرع ایک ہی بحر میں ہیں
مفعول فاعلات مفاعیل فاعلن/فاعلات (آخری رکن دونوں طرح آ سکتا ہے) اب کوشش کرو کہ دوسرے مصرعوں کو بھی اسی بحر میں ڈھال سکو تو۔۔

آپ اگر اسی شعر کی تقطیع تفصیلی طور پر کردیتے جس سے واضح ہوتا کہ 'مفعول فاعلات مفاعیل فاعلن/فاعلات' کس طرح مستنبط ہوتا ہے تو شائد اپنی بھی گاڑی سٹارٹ ہو جاتی

 

[فاتح]

محمود غزنوی صاحب! گاڑی سٹارٹ کرنے کے لیے تقطیع کا دھکا ضروری نہیں۔ اس کے لیے طبعِ رواں کا ایندھن چاہیے جو آپ کے پاس وافر مقدار میں موجود ہے۔ بہتر ہو گا کہ آپ اسی مطلع کو کم از کم 15 یا 20 مرتبہ تحت اللفظ بلکہ ترنم میں پڑھیں تو اس کا وزن آپ کی زبان پر جاری ہو جائے گا اور بس۔
پھر بھی اگر تقطیع چاہتے ہیں تو ایک عاجزانہ سی کوشش اس جاہل کی جانب سے حاضر ہے:
​

مفعول | فاعلات | مفاعیل | فاعلن
دل کو سَ | کون روح | کُ بالید | گی ملی
ذکرے مُ | حم مدی سِ | نئی زند | گی ملی
​

 

[مغزل]

شکریہ بابا جانی اور فاتح بھائی ، شکریہ محمود غزنوی

 

[محمود احمد غزنوی]

مجحے جو ابھی تک سمجھ آیا ہے اس کے لحاظ سے کچھ ہوں ہے :
دل کو س۔۔۔۔۔۔۔ کو ن رو ح۔۔۔۔۔۔ ک با لی د ۔۔۔۔۔۔۔ گی م لی
2 2 1 ۔۔۔۔۔۔۔ 2 1 2 1 ۔۔۔۔۔۔۔۔۔ 1 2 2 1 ۔۔۔۔۔۔۔۔ 2 1 2
مفعول۔۔۔۔۔۔۔۔۔۔ فاعلات ۔۔۔۔۔۔۔۔۔۔۔۔ مفاعیل۔۔۔۔۔۔۔۔۔۔ فاعلن

ذک رے م۔۔۔۔۔۔۔۔۔۔۔ حم م دی س۔۔۔۔۔۔۔۔۔۔۔۔ ن ئ زن د ۔۔۔۔۔۔۔۔۔۔۔۔ گی م لی
2 2 1 ۔۔۔۔۔۔۔۔۔۔ 2 1 2 1 ۔۔۔۔۔۔۔۔۔۔۔۔۔ 1 2 2 1 ۔۔۔۔۔۔۔۔۔۔۔۔ 2 1 2
مفعول۔۔۔۔۔۔۔۔۔۔۔۔۔۔ فاعلات۔۔۔۔۔۔۔۔۔۔۔۔۔۔۔ مفاعیل۔۔۔۔۔۔۔۔۔۔ فاعلن

لیکن آپ نے آخری 'فاعلن' کے ساتھ متبادل 'فاعلات' بھی لکھا ہے۔ ۔ اسکی سمجھ نہیں آئی

 

[فاتح]

مجحے جو ابھی تک سمجھ آیا ہے اس کے لحاظ سے کچھ ہوں ہے :
دل کو س۔۔۔۔۔۔۔ کو ن رو ح۔۔۔۔۔۔ ک با لی د ۔۔۔۔۔۔۔ گی م لی
2 2 1 ۔۔۔۔۔۔۔ 2 1 2 1 ۔۔۔۔۔۔۔۔۔ 1 2 2 1 ۔۔۔۔۔۔۔۔ 2 1 2
مفعول۔۔۔۔۔۔۔۔۔۔ فاعلات ۔۔۔۔۔۔۔۔۔۔۔۔ مفاعیل۔۔۔۔۔۔۔۔۔۔ فاعلن

ذک رے م۔۔۔۔۔۔۔۔۔۔۔ حم م دی س۔۔۔۔۔۔۔۔۔۔۔۔ ن ئ زن د ۔۔۔۔۔۔۔۔۔۔۔۔ گی م لی
2 2 1 ۔۔۔۔۔۔۔۔۔۔ 2 1 2 1 ۔۔۔۔۔۔۔۔۔۔۔۔۔ 1 2 2 1 ۔۔۔۔۔۔۔۔۔۔۔۔ 2 1 2
مفعول۔۔۔۔۔۔۔۔۔۔۔۔۔۔ فاعلات۔۔۔۔۔۔۔۔۔۔۔۔۔۔۔ مفاعیل۔۔۔۔۔۔۔۔۔۔ فاعلن

لیکن آپ نے آخری 'فاعلن' کے ساتھ متبادل 'فاعلات' بھی لکھا ہے۔ ۔ اسکی سمجھ نہیں آئی

بالکل ٹھیک سمجھے ہیں آپ گو میں نے کبھی اس بائنری سسٹم (1212121212 الخ) پر غور کرنے کی زحمت نہیں کی۔

فاعلن اور فاعلات کے بارے میں آپ نے خود ہی تو لکھا ہے کہ یہ "متبادل" ہے یعنی عروض کے قواعد کے مطابق یہاں ان دونوں میں سے کوئی بھی آ سکتا ہے۔ اسے سمجھنے کے لیے غالب کے درج ذیل شعر کی تقطیع کرتے ہیں:

لیتا ہوں مکتبِ غمِ دل میں سبق ہنوز
لیکن یہی کہ رفت گیا اور بود تھا

مفعول | فاعلات | مفاعیل | فاعلات
لیتا ہُ | مکتبے غَ | مِ دل مے سَ | بق ہنوز
مفعول | فاعلات | مفاعیل | فاعلن
لیکن یَ | ہی کِ رفت | گیا اور | بود تھا
​

یعنی ایک ہی شعر کے ایک مصرع میں فاعلات جب کہ دوسرے مصرع میں فاعلن۔

 

[سیدہ شگفتہ]

عمدہ !