عدم دنیا پہ اعتبار نہ کرتے تو ظلم تھا - عبدالحمید عدم

[معاویہ وقاص]

دنیا پہ اعتبار نہ کرتے تو ظلم تھا
یہ دل فریب موت نہ مرتے تو ظلم تھا

میرے خلوص دل کو پرکھنے کے واسطے
غیروں پہ وہ نگاہ نہ کرتے تو ظلم تھا

توبہ کو توڑنے کی تو نیت نہ تھی مگر
موسم کا احترام نہ کرتے تو ظلم تھا

دل تھا کہ مرگ و زیست کا دلچسپ امتزاج
جیتے تو اتہام تھا ، مرتے تو ظلم تھا

ہر چند موت عین جوانی میں ظلم تھی
لیکن یہ زہر کھا کے نہ مرتے تو ظلم تھا

عبدالحمید عدم