دِل کے ارماں سراپا کاش ہوئے غزل نمبر 150 شاعر امین شارؔق

[امین شارق]

الف عین سر
فاعِلاتن مفاعِلن فِعْلن

دِل کے ارماں سراپا کاش ہوئے
خُواب جو دیکھے پاش پاش ہوئے

عِشق والوں کی کم نگاہی سے
حُسن والوں کے راز فاش ہوئے

عِشق پر اے فلک ترے نیچے
سانحے کیسے دِل خراش ہوئے

ہم کیا راہِ راست پر آئے
سارے دُشمن ہی بد معاش ہوئے

وہ خزانے ملے خرابوں میں
ساری دُنیا میں جو تلاش ہوئے

غیر موجودگی میں ساقی کی
بادہ کش اور بھی اوباش ہوئے

میرے محبُوب تُجھ کو پاکر ہم
شاد ہیں، خوش ہوئے، ہشاش ہوئے

حُسن نے جِس پہ اِلتفات کیا
اُن کے تبدیل بُود و باش ہوئے

کِتنا مُشکل ہے نفس سے بچنا
مُتقی دیکھے ہیں عیاش ہوئے

پاس تم تھے تو ہم تونگر تھے
بِن ترے دیکھ ہم قلاش ہوئے

آپ تو خُوش مِزاج تھے شارؔق
عِشق میں کیسے زِندہ لاش ہوئے​

 

[الف عین]

کچھ قوافی کا غلط استعمال ہے، جنہیں تشدید کے ساتھ بولا جاتا ہے۔ عیاش، قلاش، ہشاش بشاش، سب کے دوسرے حرف پر تشدید ہے۔
اوباش کی بھی واو نہیں گرائی جا سکتی۔

ہم کیا راہِ راست پر آئے
یہ کیا، سوالیہ ہے، اسے "کا" تقطیع ہونا تھا، کِ ی ا نہیں

شاد ہیں، خوش ہوئے، ہشاش ہوئے
پہلا ٹکڑا حال میں ہے، باقی ماضی میں۔ پہلا بھی اسی صیغے میں ہونا چاہئے
باقی درست ہیں اشعار

 

[امین شارق]

الف عین سر
عیاش، قلاش، ہشاش کیا یہ الفاظ اشعار میں استعمال نہیں ہوسکتے یا تشدید لگاکر ہوسکتے ہیں۔

 

[محمد عبدالرؤوف]

الف عین سر
عیاش، قلاش، ہشاش کیا یہ الفاظ اشعار میں استعمال نہیں ہوسکتے یا تشدید لگاکر ہوسکتے ہیں۔

ان قوافی کو اس غزل کی بحر قبول نہیں کرے گی