دیوار میں در رکھنا

[حسیب احمد حسیب]

غزل !

دیوار میں در رکھنا
دیوار مگر رکھنا

پرواز کے موسم تک
ٹوٹے ہوئے پر رکھنا

شیشے کی عمارت ہے
پتھر کا جگر رکھنا

حق میرا مجھے دے دو
پھر دار پہ سر رکھنا

جانا ہے عدم بستی
کیا زاد سفر رکھنا

پندار بھلے ٹوٹے
کردار مگر رکھنا

کٹ جائے بھلے گردن
دستار میں سر رکھنا

لمبی ہے شب فرقت
آنکھوں میں سحر رکھنا

سورج سے نہیں خطرہ
جگنو پہ نظر رکھنا

تہذیب کے لاشے کو
مت لا کے ادھر رکھا

باطن ہے منور تو
کیا شمس و قمر رکھنا

مشکل ہے بہت مشکل
دل میں تیرے گھر رکھنا

شعروں میں حسیب اپنے
کچھ لعل و گہر رکھنا

حسیب احمد حسیب
​

 

[الف عین]

واہ، اچھی غزل ہے

 

[امین یوسف]

غزل اچھی لگی۔۔۔۔۔سخن پختہ و پروردہ و تہدار کی تعریف میں آتی ہے۔

 

[محمد تابش صدیقی]

واہ حسیب بھائی بہت عمدہ غزل ہے۔

دیوار میں در رکھنا
دیوار مگر رکھنا

پرواز کے موسم تک
ٹوٹے ہوئے پر رکھنا

شیشے کی عمارت ہے
پتھر کا جگر رکھنا

پندار بھلے ٹوٹے
کردار مگر رکھنا

 

[سید اسد معروف]

بہت خوب۔۔اتنی چھوٹی بحر میں اتنے بڑے مضامین و خیالات۔۔۔۔