دیکھا ابھی سے جان بچانے پہ آ گئے

[ڈاکٹرعامر شہزاد]

دیکھا ابھی سے جان بچانے پہ آ گئے
چھوڑوں گا مَیں نہیں جو نشانے پہ آ گئے

چُپ چاپ جو کھڑے ھیں شجر اپنے یار ھیں
سوچو !! اگر یہ شور مچانے پہ آ گئے

قہّار بن گئے ھیں ضرورت کے واسطے
رحمٰن اور رحیم ۔۔۔ ڈرانے پہ آ گئے

خواب و خیال جانے پہ آمادہ ھی نہیں
کِن قیدیوں کو تُم سے چُھڑانے پہ آ گئے

یہ کھینچنا ھے عشق کو پتھریلی راہ پر
کیا سُن سکو گے ھم جو سُنانے پہ آ گئے

یہ عشق بھی عجیب ھے سوچا نہ کُچھ ذرا
غالب کی طرح پاوں دبانے پہ آگئے

ھم گھاس پر چلے تھے ترے عشق میں مگر
آتش فشاں کے جلتے دھانے پہ آ گئے

روکیں نہ عشق سے ھمیں گاھے بگاھے آپ
آ کر دکھا بھی دیں گے جو آنے پہ آ گئے

اب تک سمجھ رھا تھا مَیں انسان آپ کو
کیوں ناگ بن کےآپ خزانے پہ آ گئے

سارا خمار اُتر گیاخواب و خیال کا
اس ھجر میں تو ھوش ٹھکانے پہ آ گئے

بچّے ھیں آنسو اور یہ پلکیں ھیں کھڑکیاں
آنا نہیں تھا تیرے بُلانے پہ آ گئے

یہ بھی عجب طریق ھے لوگوں کا ان دنوں
اپنی نہیں سُنائی زمانے پہ آ گئے

رفيع رضا​